कै.अण्णासाहेब चिरमुले यांची 155 वी जयंती साजरी

सातारा : सातारा कर्मभूमी मानून कार्य करणारे थोर व्यक्तिमत्व म्हणजे विमामहर्षी कै.वा.ग.तथा अण्णासाहेब चिरमुले ! त्यांची 155 वी जयंती दि.04/06/2019 रोजी कै.अण्णासाहेब चिरमुले चॅरिटेबल ट्रस्टतर्फे संपन्न झाली.
यावेळी ट्रस्टचे माजी विश्‍वस्त व आमदार श्रीमंत छत्रपती शिवेंद्रसिंहराजे भोसले व शैळेंद्र पळणिटकर यांनी कै.अण्णासाहेबांचे प्रतिमेस पुष्पहार अर्पण करुन अभिवादन केले.
यावेळी बोलताना आमदार श्रीमंत छत्रपती शिवेंद्रसिंहराजे भोसले म्हणाले, सातार्‍याचे नाव देशभर व जागतिक स्तरावर नेण्याचे काम विशेषत: आर्थिक व विमा क्षेत्रात कै.अण्णासाहेब यांनी केले. दूरदृष्टी असलेले निस्वार्थी व्यक्तिमत्व कै.अण्णासाहेब यांनी सातार्‍यात विविध संस्था स्थापन करुन सातार्‍याच्या विकासासाठी महत्वाचे योगदान दिले. आज काळाच्या परंपरेत योगायोगाने एक वर्तुळ – युनायटेड वेस्टर्न बँक – आय डी बी आय बँक – एल.आय.सी – असे पूर्ण होत आहे. त्यांचे स्मृतीस अभिवादन करुन नविन पिढीने प्रेरणा घेणे महत्वाचे आहे.शैलेंद्र पळणिटकर यांनीही कै.अण्णासाहेबांचे स्मृतीस श्रद्धांजली वाहिली. सातार्‍याचे जडणघडणीत मोठे योगदान देणार्‍या व्यक्तीचे अनुकरण युवा पिढीने केले पाहिजे असे त्यांनी सांगितले. त्यासाठी त्यांचे कार्याचा परिचय दै.ऐक्य मधून देण्याचे आश्‍वासन त्यांनी दिले. श्रीधर साळुंखे यांनी विश्‍वस्तपदाची भूमिका ट्रस्टी कंपनी चांगली निभावत असल्याचे सांगितले.श्री कन्हैयाशेठ राजपुरोहित तसेच आय डी बी आय बँकेचे श्री बाबर यांनी कै.अण्णासाहेबांना आदरांजली वाहीली. या कार्यक्रमास आय डी बी आय बँकेचे अधिकारी तसेच ट्रस्टी कंपनी स्टाफ, सुधीर धुमाळ, श्रीकांत कात्रे, श्रीकांत शेटे, सचिन देशमुख व मान्यवर उपस्थित होते.
प्रस्ताविक ट्रस्टचे विश्‍वस्त व माजी नगराध्यक्ष डॉ.अच्युतराव गोडबोले यांनी केले. उपस्थितांचे आभार ट्रस्टी कंपनीचे व्हाईस प्रसिडेंट व ट्रस्टचे विश्‍वस्त दिलीप पाठक यांनी मानले. कार्यक्रम यशस्वी करण्यासाठी ट्रस्टी कंपनीच्या सौ.माचवे, सौ.पतकी व सर्व सेवकवर्गाने सहकार्य केले.