सातारा : भारतीय समाजवादी रिपब्लिकन पक्ष महाराष्ट्र शाखा सातारा जिल्ह्याच्या वतीने सरकारचे लक्ष वेधण्यासाठी आज जिल्हाधिकारी कार्यालयासमोर चक्री उपोषण करण्यात आले.
जिल्हाधिकारी श्वेता सिंघल यांना दिलेल्या निवेदनात म्हटले आहे की, शासकीय नोकर भरती तात्काळ सुरू करावी, सरकारी नोकरांच्या पेन्शन 2005 पासून सर्वांना सुरू कराव्यात, भटके विमुक्त, धनगर, वंजारी व विशेष मागास प्रवर्ग यांचा समावेश अनुसूचित जमातीत करावा, कॉन्ट्रॅक्ट पध्दतीने भरती बंद करावी, किमान वेतन कायद्याची अंमलबजावणी, खासगीकरण केलेल्या सर्व उद्योगधंद्यांना, सेवाउद्योगांना लागू करावी, खासगी सेवा उद्योगातील कर्मचार्यांना कायद्याने संरक्षण द्यावे, अनुसूचित जाती जमाती, भटक्या विमुकत जमाती, विशेष प्रवर्ग या सर्वांचा बॅकलॉग तात्काळा भरावा, खासगीकरण, उदारीकरण बंद करावे, शासकीय मंडळे, महामंडळे यातील सेवा भरती सुरू करावी अशी मागणीसाठी भारतीय समाजवादी रिपब्लिकन पक्षातर्फे चक्री उपोषण सुरू केले आहे.
या चक्रीउपोषणात माजी आमदार व पक्षाचे राष्ट्रीय अध्यक्ष लक्ष्मण माने, जिल्हाध्यक्ष दगडू रस्ते, जिल्हा कार्याध्यक्ष बाळासाहेब माने, जिल्हाउपाध्यक्ष मल्हारी जाधव, डॅनिअल खुडे व इतर पदाधिकारी सहभागी झाले आहेत.
