वडूजला धनगर समाजाचा मोर्चा ; आरक्षणासाठी राजीनामा

वडूज :  धनगर समाजाला अनुसूचित जमाती (एस.टी) प्रवर्गात आरक्षण तातडीने द्यावे या मागणीसाठी खटाव तालुक्यातील धनगर समाज बांधवांनी ढोल गजाच्या तालावर तहसिलदार कार्यालयावर मोर्चा काढला.
येथील हुतात्मा स्मारकापासून मोर्चाला सुरूवात झाली. अहिल्यादेवी चौक, बाजारपेठ, शेतकरी चौक, बाजार पटांगण,  शहा पेट्रोल पंप, छत्रपती शिवाजी चौक, बस स्थानक मार्गे हा मोर्चा तहसिलदार कार्यालयावर गेला. त्यानंतर समाज बांधवांनी तहसिलदार कार्यालयाच्या प्रांगणात गजीनृत्याचा ठेका धरला. गजी नृत्याच्या दोन घाई झाल्यानंतर मान्यवर कार्यकर्त्यांनी मोर्चास संबोधीत केले. यावेळी बोलताना शेळी मेंढी महामंडळाचे माजी अध्यक्ष टी. आर. गारळे, बाजार समितीचे संचालक विजय काळे, चंद्रकांत काळे, डॉ. महेश माने, आण्णा काकडे, रामदास शिंगाडे, नितीन बुरूंगले, आदींची भाषणे झाली. यावेळी बहुतांशी वक्त्यांनी आरक्षण देण्यास सरकार वेळकाढू पणा करीत असल्याबद्दल नाराजी व्यक्त करत मुख्यमंत्री देवेंद्र फडणवीस यांच्यावर चांगलेच तोंडसुख घेतले. तर प्रस्थापित राजकीय पक्षांना धडा शिकविण्याबरोबर सातारा येथील शुक्रवार दि. 24 रोजीचा आगामी मोर्चा यशस्वी करण्याचा निर्धार व्यक्त केला.
अ‍ॅड. नंदकुमार वाघमोडे यांनी भाषणातच आपल्या सहाय्यक सरकारी वकील पदाचा राजीनामा देत असल्याची घोषणा केली. मोर्चात पंचायत समितीचे माजी सदस्य मोहनराव बुधे, राष्ट्रवादीच्या महिला आघाडीच्या अध्यक्षा आशाताई बरकडे, श्रीकांत काळे, अ‍ॅड. राहूल काळे, सुनिल सजगणे,हणमंतराव कोळेकर, राहूल सजगणे, अशोक काळे, प्रसाद काळे, महादेव बुरूंगले, राजाराम बरकडे, संजय काळे, शहाजी गोफणे, समीर गोरड, शशिकांत काळे, विक्रम काळे, भरत जानकर आदीसह युवक व महिला मोठ्या संख्येने सहभागी झाले होते.