दिव्यांगांना यंदा लोकसभा निवडणूक अधिक सुलभ होणार

साताराः दिव्यांगांना यंदा लोकसभा निवडणूक अधिक सुलभ होणार आहे. दिव्यांगांना मतदानासाठी विविध सुविधा देण्याबरोबरच भारत निवडणूक आयोगाने यंदा त्यांच्यासाठी पीडब्ल्यूडी हे नवीन मोबाइल अ‍ॅप उपलब्ध करून दिले आहे.
निवडणूक आयोगाने दिव्यांग मतदारांसाठी सुलभ निवडणुका हे घोषवाक्य निश्‍चित केले आहे. जिल्ह्यात दिव्यांग मतदारांची संख्या 11 हजार 693 इतकी आहे. दिव्यांगांना मतदानाकडे आकर्षित करण्यासाठी तसेच त्यांच्यासाठी मतदान प्रक्रिया अधिकाधिक सुलभ व्हावी यासाठी आयोगाने पुढाकार घेतला आहे. दिव्यांगांसाठी काम करणार्‍या स्वयंसेवी संस्था, अपंग कल्याण आयुक्तालय यांची याकामी मदत घेण्यात येत आहे. त्यांच्या सहाय्याने यंदा दिव्यांग मतदारांची विशेष नोंदणी मोहिम राबवण्यात आली. अपंगांना मतदान केंद्रांवर आवश्यक सुविधा पुरवण्यात याव्यात, असे निर्देश जिल्हाधिकार्‍यांना देण्यात आले आहेत. या सुविधांबाबत निवडणुकीशी संबंधित अधिकार्‍यांना विविध प्रशिक्षणांमध्ये अवगत करण्यात आले आहे. दिव्यांगांना सुविधा देण्यासाठी जिल्हास्तर तसेच राज्यस्तरावर सुकाणू समित्या स्थापन करण्यात आल्या आहेत.
मतदान केंद्रांवर दिव्यांगांना रांगेशिवाय प्रवेश, संख्या अधिक असल्यास दिव्यांगांसाठी स्वतंत्र रांग, रॅम्प सुविधा, अधिक प्रकाश व्यवस्था, व्हील चेअर जाऊ शकेल असा मोठा दरवाजा, दिव्यांगांसाठी स्वतंत्र पार्किंग आदी सुविधा असणार आहेत. याशिवाय मागणीनुसार मतदान केंद्रापर्यंत मोफत वाहतूक व्यवस्था व व्हीलचेअरची सुविधाही प्रशासनामार्फत उपलब्ध करून दिली जाणार आहे. दरम्यान, दिव्यांगांची मतदार नोंदणी, मतदान केंद्राचा शोध, व्हीलचेअरची मागणी इत्यादी सोयी उपलब्ध करून घेण्यासाठी पीडब्ल्यूडी हे अ‍ॅप उपलब्ध करून देण्यात आले आहे. हे मोबाईल अ‍ॅप डाऊनलोडसाठी गुगल प्ले स्टोअरवर उपलब्ध आहे. या अ‍ॅपवर जाऊन मागणी केल्यास दिव्यांग मतदारांना प्रशासनामार्फत व्हीलचेअर, मतदान केंद्रापर्यंत मोफत वाहतूक सुविधा उपलब्ध करून देण्यात येणार आहे.