आयकॉनिक सातारा स्पर्धेचा पारितोषिक वितरण समारंभ दि.12 नोव्हेंबर रोजी

सातारा : सातारा नगर परिषदेच्या नियोजित प्रशासकीय इमारतीच्या संकल्प रेखांकनासाठी घेण्यात आलेल्या आयकॉनिक सातारा या वास्तू विशारदांच्या देश पातळीवरील स्पर्धेचा पारितोषिक वितरण समारंभ दि. 12 नोव्हेंबर 2017 रोजी सकाळी 11.00 वाजता जिल्हा परिषदेच्या यशवंतराव चव्हाण सभागृहात होणार आहे. समारंभासाठी श्री. छ. उदयनराजे व छ. शिवेंद्रसिंहराजे तसेच शहरातील मान्यवर उपस्थित राहणार आहेत. यावेळी परीक्षकांनी निवडलेल्या सर्वोत्कृष्ठ 32 इमारत आराखड्यांचे प्रदर्शन जनतेस पाहण्यासाठी कार्यक्रम स्थळी आयोजित करण्यात येणार आहे. सदरचे प्रदर्शन दि. 12 व 13 नोव्हेंबर साठी जनतेस पाहण्यासाठी खुले असणार आहे. अशी माहिती सातारा नगर परिषदेचे मुख्याधिकारी. श्री. शंकर गोरे यांनी आज येथे झालेल्या पत्रकार परिषदेत दिली. याप्रसंगी दि इंडिअन इंन्स्टिट्यूट ऑफ आर्किटेक्टसच्या सातारा शाखेतील स्पर्धा आयोजन समितीचे सदस्य वास्तूविशारद उपस्थित होते.
स्पर्धेविषयी अधिक माहिती आयोजन समितीतील जेष्ठ वास्तूविशारद श्री. महेंद्र चव्हाण यांनी दिली. सध्या देशामध्ये सर्वात दुर्लक्षित व्यावसायिक क्षेत्र हे वास्तुविशारदांचे असून देशाच्या सुयोग्य नियोजनात त्यांचा मोलाचा वाटा असूनही त्यांचेकडे सापत्न भावाने बघितले जाते. सरकारी पातळीवर वास्तूविशारद व अभियंते यांना रेखांकन विषयक कामात एकच मापदंड लावले जातात, किंवा अभियंत्यांना झुकते माप दिले जाते. वस्तुतः वास्तूविशारद हे इमारत निर्मितीसाठी सर्वोच्च पात्र असतात. सर्वसामान्य जनतेलाही वास्तूविशारद व अभियन्त्यांमध्ये फरक करता येत नाही. या परिस्थितीमध्ये व श्री. छ. उदयनराजे नगर परिषदेच्या नियोजित इमारतीसाठी अत्युत्तम आराखड्यासाठी आग्रही आहेत हे पाहून फक्त स्वःताचा विचार न करता स्थानिक वास्तुविशारदांनी सदर इमारतीसाठी राष्ट्रीय पातळीवर स्पर्धा घेण्याची कल्पना मांडली ज्यास महाराजसाहेबांनी त्वरित उचलून धरले. या कल्पनेस श्री. छ.शिवेंद्रराजे, नगर परिषदेचे पदाधिकारी तसेच सर्व नगरसेवकांनी एकमुखी मान्यता दिल्याने संस्थेस हि कल्पना प्रत्यक्षात आणणे शक्य झाले. या स्पर्धेमुळे सर्व सरकारी, निमसरकारी संस्था तसेच जनतेस वास्तुकलेची अमूर्त ताकद समजून येईल अशी आशा आहे.
या रेखांकन आराखडा स्पर्धेची सुरुवात फेब्रुवारी महिन्यात देश पातळीवर वर्तमानपत्रात जाहिरात देऊन झाली. सदर स्पर्धा नवी दिल्ली येथील वास्तुकला परिषदेशी नोंदणीकृत वास्तुविशारदांसाठी खुली होती. सदर स्पर्धा आय. आय. ए. सारख्या सर्वमान्य संस्थेची शाखा घेत असल्याने त्यास देशातील तमाम वास्तुविशारदांनी भरघोस प्रतिसाद दिला. स्पर्धेसाठी जवळपास 200 वास्तुविशारदांनी नोंदणी केली. व प्रत्यक्ष्यात 118 जणांनी आपले रेखांकन परीक्षणासाठी सादर केले. वन प्लॉट, वन प्रोग्रॅम व 118 कल्पना यामधून सर्वोत्कृष्ठ कल्पना निवडणे हे खरोखरच परीक्षकांची कसोटी पाहणारे होते. परंतु स्पर्धेचे परीक्षक म्हणून काम पाहणारे देशातील नामवंत वास्तूविशारद सर्वश्री. नितीन किल्लावाला, चंद्रशेखर कानेटकर व संजय पाटील यांनी आपले काम चोख पार पाडले आहे. संपूर्ण स्पर्धेदरम्यान पारदर्शकता, गोपनीयता राखल्याने व राजकीय हस्तक्षेपाचा अभाव राहिल्याने स्पर्धा सुयोग्यपणे पार पडली व आता आपण पारितोषिक वितरण सोहळा अनुभवणार आहोत. यातच अंतिम विजेत्याची घोषणा होणार आहे. स्पर्धेतील विजेता, उपविजेता व तृतीय क्रमांकाला अनुक्रमे रु. अडीच लाख, दीड लाख व एक लाखाचे रोख इनाम दिले जाणार आहे. तसेच अंतिम विजेत्यास या इमारतीचा वास्तूविशारद म्हणून नेमणूक मिळणार आहे. स्पर्धेतील अंतिम 12 आराखड्यांचा समावेश असलेले कॉफीटेबल बुक यानिमित्ताने प्रकाशित केले जाणार असून त्याची सवलतीच्या दारात प्रदर्शनस्थळी विक्री केली जाणार आहे. सदरचे पुस्तक हे बांधकाम व्यावसायिक, वास्तुकलेची महाविद्यालये तसेच यात रुची असणार्‍या सर्वांसाठी एक संग्राह्य पुस्तक असेल. अश्या प्रकारची व इतका मोठा प्रतिसाद लाभलेली हि राज्यातील पहिलीच स्पर्धा असून यापुढे सरकारी, निमसरकारी संस्थांनी त्यांच्या स्वःताच्या इमारतीसाठी हा पायंडा पाडावा असे आवाहनही त्यांनी केले.
या स्पर्धेसाठीचा एकूण रु. पंचवीस लाख खर्च आय. आय. ए. सातारा शाखेने स्वताच्या गंगाजळीतून व प्रायोजकांच्या मदतीने केला असून त्याचा कसलाही आर्थिक भार नगर परिषदेस सोसावा लागलेला नाही. तरी सातारकरांनी पारितोषिक सोहळ्यास बहुसंख्येने उपस्थित रहावे व यानिमिताने भरविण्यात येणार्‍या स्पर्धेतील निवडक आराखड्यांच्या प्रदर्शनास भेट देऊन देशातील नामवंत वास्तुविशारदांनी सादर केलेल्या वास्तूकलेच्या अमूर्त कल्पनाविष्कारास दाद द्यावी असे आवाहन मुख्याधिकारी व स्पर्धा आयोजन समितीच्या सदस्यांनी केले आहे.