कराड तालुक्यात 3 लाख 10 हजार वृक्ष लागवडीचे उद्दिष्ट

कराड : राज्य शासनाच्या 33 कोटी वृक्ष लागवड मोहितेअंतर्गत कराड तालुक्याला 3 लाख 10 हजार वृक्ष लागवडीचे उद्दिष्ट दिले आहे. येत्या 1 जुलै ते 31 सप्टेंबरपर्यंत ही वृक्ष लागवड मोहिम शासकीय-निमशासकीय व लोकसहभागातून राबविण्यात येणार असल्याची माहिती परिक्षेत्र वनाधिकारी डॉ.अजित साजणे यांनी दिली.
महाराष्ट्र राज्य वन विभागाने 33 कोटी वृक्ष लागवडीचा संकल्प केला आहे. या संकल्प पूर्तीसाठी 1 जुलै ते 31 सप्टेंबर 2019 या कालावधीत सातारा जिल्ह्यासाठी 1 कोटी 34 लाख तर कराड तालुक्यासाठी 3 लाख 10 हजार वृक्ष लागवडीचे उद्दिष्ट दिले आहे. या अनुषंगाने वराडे येथील वनविभागाच्या मध्यवर्ती रोपवाटीकेत सुमारे साडेतीन लाख रोपे तयार करण्यात आली आहेत. यामध्ये लहान व मोठ्या रोपांचा समावेश आहे. ही रोपे महात्मा गांधी ग्रामीण रोजगार हमी योजनेअंतर्गत व राज्य योजनेअंतर्गत तयार करण्यात आली असून यासाठी 22 स्त्रीया व 5 पुरूष असे एकुण 27 वनमजुर काम करीत आहेत. रोपवाटीकेत जांभळ, आंबा, पिंपळ, वाळवा, लिंब, करंज, फणस, कांचन, उंबर, शिसु, चिंच, शिवर, रेंड्डी, सिताफळ, वड, गुलमोहर, टेंबुर्णी, पेरू, शिरस, बोर, आपटा, खैर, बाबु, हिवर, साग, रेनट्री, मेडसिंग यासह अन्य रोपांचा समावेश आहे. वनविभागाने तयार केली सर्व रोपे उच्च दर्जाची आहेत. झाडांच्या बिया जमा करून ते माती व शेणखताच्या सहाय्याने रोपे तयार करण्यात आली आहेत. सध्या मोठी रोपे सुमारे 6 फुटांपर्यंत वाढली आहेत.
येत्या 1 जुलैपासून 33 कोटी वृक्ष लागवड मोहीम शासकीय, निमशासकीय व लोकसहभागातून राबविण्यात येणार आहे. यामध्ये ग्रामपंचायतींना वगळून इतर सर्व शासकीय यंत्रणांना मागणीनुसार वनविभाग रोपांचे वाटप करणार आहे. यामध्ये कृषी, महसुल, सार्वजनिक बांधकाम, लघुपाटबंधारे आदी विभागांचा समावेश आहे. तर ग्रामपंचायतींना सामाजिक वनीकरणाच्या माध्यमातून रोपवाटप केले जाणार आहे. प्रत्येक ग्रामपंचायतीला सुमारे 3200 रोपांच्या लागवडीचे उद्दीष्ट देण्यात आले आहे. वनविभागाने वृक्ष लागवडीचे नियोजन केले असून त्यानुसार ज्या-ज्या ठिकाणी वृक्ष लागवड करण्यात येणार आहे. त्या ठिकाणी डबरे काढुन मातीचा भरावा करून ठेवला आहे. दि.1 जुलैपासून स्थानिक लोकप्रतिनिधी यांच्यासह शासकीय-निमशासकीय संस्था, शाळा-महाविद्यालय, सार्वजनिक मंडळे, सामाजिक संस्था तसेच लोकसहभागातून ही वृक्ष लागवड चळवळ यशस्वी करणार असल्याचे परीक्षेत्र वनाधिकारी डॉ.अजित साजणे यांनी सांगितले.
रोपे आपल्या दारी यंदाही मोहीम राबविणार
रोपे आपल्या दारी ही मोहीम वनविभागाने गेल्या वर्षांपासून सुरू केली आहे. यंदाही कराड शहरातील बसस्थानक, कोल्हापूर नाका अशा प्रमुख ठिकाणी ही मोहीम राबविण्यात येणार आहे. नागरिकांसाठी ही रोपे माफक दरात दिली जाणार आहेत. तसेच कराड तालुक्यात वनविभागाची 33 कोटी वृक्ष लागवड समिती गठीत करण्यात आली असून या समितीचे अध्यक्ष प्रांताधिकारी हिम्मत खराडे व सचिव डॉ.अजित साजणे आहेत. या समितीत सर्व शासकीय विभागातील अधिकार्‍यांचा सदस्य म्हणून समावेश आहे. आत्तापर्यंत या समितीच्या तीन बैठका झाल्या आहेत. असे डॉ.अजित साजणे यांनी सांगितले.
महाराष्ट्रात कराड तालुक्यातील हरित सेनेची नोंदणी अव्वल
रोप लागवड, रोपवत करण्यासह वन्यजीव व मनुष्य यांच्यातील संघर्ष रोखण्यासाठी हरित सेना महत्वाची भूमिका बजावत असते. कराड तालुक्यात तब्बल 40 हजार हरित सेनेची नोंदणी झाली असून ही नोंदणी महाराष्ट्रात तालुका स्तरावरील अव्वल असल्याची माहिती डॉ.अजित साजणे यांनी दिली.