भुईंज : किसन वीर सातारा सहकारी साखर कारखान्यास पुणे येथील वसंतदादा शुगर इन्स्टिट्युटच्यावतीने दुसर्‍यांदा राज्यस्तरीय स्व. रावसाहेबदादा पवार बेस्ट डिस्टीलरी अवार्ड जाहीर झाला आहे. मंगळवारी (दि.26) वसंतदादा शुगर इन्स्टिट्युटच्या वार्षिक सर्वसाधारण सभेत माजी केंद्रिय कृषीमंत्री व संस्थेचे अध्यक्ष शरदराव पवार, राज्याचे मुख्यमंत्री देवेंद्र फडणवीस यांच्या हस्ते आणि सहकार मंत्री सुभाषराव देशमुख यांच्यासह विविध खात्याचे मंत्री, संस्थेचे पदाधिकारी व विविध मान्यवरांच्या प्रमुख उपस्थितीत या पुरस्काराचे वितरण होणार आहे. संस्थेचे महासंचालक शिवाजीराव देशमुख यांनी पत्राद्वारे कारखान्यास ही माहिती दिली आहे. किसन वीर कारखान्यास यापुर्वी 2009-10 मध्ये बेस्ट डिस्टीलरी अवार्डने सन्मानित करण्यात आले आहे.
कारखान्याचे अध्यक्ष मदनदादा भोसले यांच्या नेतृत्वाखालील विद्यमान संचालक मंडळाने सभासदहिताचे नवनवीन उपक्रम राबविताना साखर उत्पादनासह विविध पुरक उद्योग व डिस्टीलरीतील उत्पादनाला सर्वोच्च प्राधान्य दिलेले आहे. पांढर्‍या शुभ्र दाणेदार साखरेच्या उत्पादनाबरोबरच कारखाना व्यवस्थापनाने डिस्टीलरीचे प्रतिदिन एक लाख लिटर उत्पादन क्षमतेपर्यंत विस्तारिकरण केले आहे. त्याचबरोबर प्रतिदिन साठ हजार लिटर क्षमतेचा इएनए प्रकल्प, प्रतिदिन एैंशी हजार लिटर क्षमतेचा इथेनॉल प्रकल्प, प्रतिदिन बारा टन क्षमतेचा फुडग्रेड कार्बन डायऑक्साईड प्रकल्प, डिस्टीलरीतील टाकाऊ स्पेंटवॉशपासून टिकाऊ सीबीजी-सीएनजी निर्मिती प्रकल्प उभारून डिस्टीलरी उत्पादनांचा दर्जा व गुणवत्ता टिकविताना क्षमतेचा जास्तीत जास्त वापर केला आहे. हंगाम 2016-17 मध्ये कारखान्याचे अध्यक्ष मदनदादा भोसले यांच्या मार्गदर्शनाखाली डिस्टीलरी मॅनेजर एस. वाय. महिंद व या विभागातील अधिकारी-कर्मचार्‍यांनी डिस्टीलरी क्षमतेचा केलेला जास्तीत जास्त वापर, घेतलेला सर्वाधिक उतारा, विक्रमी डिस्टीलरी उत्पादन आदी बाबींचा विचार करून व्हीएसआयने कारखान्यास स्व. रावसाहेबदादा पवार बेस्ट डिस्टीलरी अवार्ड जाहीर केला आहे.
मदनदादा भोसले यांच्या नेतृत्वाखालील किसन वीर साखर कारखान्यास आत्तापर्यंतच्या चौदा वर्षाच्या कार्यकाळात व्हीएसआयसह विविध शासकीय व निमशासकीय संस्थांच्यावतीने स्व. विलासराव देशमुख सर्वोत्कृष्ठ उद्योजकता, बेस्ट डिस्टीलरी, बेस्ट मॅनेजिंग डायरेक्टर, बेस्ट डिस्टीलरी मॅनेजर, बेस्ट केन डेव्हलपमेंट ऑफिसर, उत्कृष्ठ ऊस विकास व संवर्धन (व्हीएसआय) बेस्ट रिकन्स्ट्रक्शन ऑफ सिक मिल इंडस्ट्री, बेस्ट मॅनेजिंग डायरेक्टर को-ऑपरेटिव्ह शुगर मिल (भारतीय शुगर), पर्यावरण गौरव (एमपीसीबी), उत्कृष्ठ ऊर्जा बचत आणि व्यवस्थापन (मेडा), वनश्री (महाराष्ट्र शासन), गोल्ड मेडल फॉर बेस्ट पेपर्स् इन इथेनॉल प्रॉडक्शन (सिस्टा) आणि फलोत्पादन दिशादर्शक गौरव (युवक बिरादरी) अशा एकूण तेरा पुरस्कारांनी सन्मानित केलेले असून कारखान्यास जाहीर झालेला हा चौदावा तर व्हीएसआयचा सातवा पुरस्कार आहे. या पुरस्कारामुळे कारखान्याच्या शिरपेचात आणखी एक मानाचा तुरा खोवला गेला आहे.
