फलटण : संतश्रेष्ठ ज्ञानेश्वर महाराजांच्या पालखी सोहळ्याच्या सातारा जिल्ह्यातील वास्तव्यादरम्यान शासकिय यंत्रणेच्या प्रत्येक विभागाने स्वच्छता, पाणी, आरोग्य, रस्ते, वीज, इंधन पुरवठा आदी महत्वपुर्ण बाबींमध्ये कुठल्याही प्रकारची गैरसोय होणार नाही याबाबत दक्ष रहावे अशी सूचना देत शासकीय यंत्रणांनी आपसी ताळमेळ राखत या सोहळ्यात सहभागी असणार्‍या वारकर्‍यांची कोणतीही गैरसोय होणार नाही या दृष्टीने सज्ज राहून कार्यरत रहावे असे आवाहन जिल्हाधिकारी श्वेता सिंघल यांनी केले आहे.
संतश्रेष्ठ ज्ञानेश्वर महाराजांचा पालखी सोहळ्याच्या सातारा जिल्ह्यातील वास्तव्या दरम्यान वारकर्‍यांना शासकीय यंत्रणेतील प्रत्येक विभागाने कशा पध्दतीने सेवा व सुविधा उपलब्ध करुन देण्याचे नियोजन केले आहे, याचा आढावा घेण्यासाठी आयोजित करण्यात आलेल्या जिल्हा व तालुकास्तरीय अधिकार्यांच्या आढावा बैठकीत जिल्हाधिकारी सिंघल यांनी आवश्यक सुचना करीत मार्गदर्शन केले. येथील इंदिरा गांधी सांस्कृतिक भवन येथे पार पडलेल्या या बैठकीस पालखी सोहळ्याचे प्रमुख विकास ढगे-पाटील, पालखी सोहळ्याचे मालक बाळासाहेब आरफळकर, अतिरिक्त पोलिस अधिक्षक शाम पवार, चोपदार फौंडेशनचे अध्यक्ष राजाभाऊ चोपदार, पंचायत समितीच्या सभापती रेश्मा भोसले, उविभागीय पोलीस अधिकारी रमेश चोपडे, वाईच्या प्रांत आस्मिता मोरे, तहसिलदार विजय पाटील, गटविकास अधिकारी विजयसिंह जाधव, आदींस विविध विभागांचे अधिकारी उपस्थित होते.
यावेळी बैठकीत जिल्हा परिषद व सार्वजनिक बांधकाम, आरोग्य विभाग, ग्रामीण पाणी पुरवठा योजना, पोलीस प्रशासन, जिल्हा माहिती अधिकारी, नीरा उजवा कालवा विभाग, एसटी महामंडळ, वीज वितरण, राज्य उत्पादन शुल्क, पशुसंवर्धन आदी विभागातील जिल्हा व तालुकास्तरीय अधिकार्यांनी आपआपल्या विभागाच्या वतीने पालखी सोहळ्याच्या अनुषंगाने करण्यात येत असलेल्या नियोजणाची माहिती दिली. या बैठकीत प्रामुख्याने पालखी मार्गाची दुरुस्ती देखभाल, रस्त्याकडेची झाडे, झुडपे काढणे, रस्त्याकडेच्या धोकादायक विहीरींना काटेरी कुंपन घालणे, लोणंद ते फलटण दरम्यानच्या रस्ता दुभाजकाची दुरुस्ती व त्याला पांढरा रंग देणे, या मार्गावरील अपुर्णावस्थेत असलेल्या रस्त्याच्या ठिकाणी धोक्याची सूचना देणारे फलक लावणे, तरडगाव येथील चांदोबाचा लिंब परिसरातील रस्ता अरुंद असल्याने सोहळा त्यामार्गावरुन जाताना घ्यावयाच्या विशेष दक्षते बाबतचे नियोजन, लोणंद, तरडगाव, फलटण, बरड या सातारा जिल्ह्यातील चारही पालखी तळावरील स्वच्छता, पिण्याच्या पाण्याची व्यवस्था, तात्पुरती शौचालये व स्नानगृहांची व्यवस्था, पालखी तळावरील वीज, पाणी, रस्ते, आरोग्य याबाबतचे नियोजन नेमकेपणाने कशा पध्दतीने करण्यात आले आहे याची माहिती जिल्हाधिकारी सिंघल यांनी घेतली व संमंधितांना आवश्यक त्या सुचना केल्या. त्याचप्रमाणे सोहळा मुक्कामाच्या ठिकाणाहून पुढे जात असताना वाहतूकीचे नियोजन, सोहळ्यातील दिंडीकर्‍यांच्या वाहनांची तसेच अन्य वाहतूकीची पर्यायी मार्गाने केलेली व्यवस्था पालखी तळावर, सकाळची न्याहरी, दुपारचा विसावा व पालखी मार्गावर सुरक्षिततेच्या दृष्टीने पोलीस यंत्रणेेने केलेले नियोजन, महसूल खात्यांतर्गत पुरवठा विभागाच्यावतीने दिंडीकर्‍यांसाठी आवश्यक गॅस व रॉकेल पुरवठ्यासाठी केलेले नियोजन याचीही माहिती सिंघल यांनी घेतली. तसेच आळंदी ते पंढरपूर मार्गावरील पहिले उभे रिंगण चांदोबाचा लिंब, तरडगाव ता. फलटण येथे परंपरागत पध्दतीने होत असल्याने तेथील सुरक्षितता व अन्य व्यवस्थेबाबत केलेल्या नियोजनाचाही आढावा या बैठकीत घेतला गेला.
याप्रसंगी पालखी सोहळ्यातील वारकरी व दर्शनासाठी येणार्या भाविकांच्या सुरक्षिततेच्या दृष्टीकोनातून पालखी तळावर ज्या त्रुटी व समस्या आढळल्या त्याबाबत पालखी सोहळा प्रमुख विकास ढगे-पाटील यांनी सविस्तर मार्गदर्शन केले. पालखी तळावर दर्शन बारीचे योग्य नियोजन, प्लास्टिक मुक्ती, आळंदी ते पंढरपूर या संपुर्ण मार्गावर संपुर्ण पालखी सोहळ्याचे ड्रोन क्यामेर्याद्वारे चित्रीकरण करण्यात यावे, पालखी तळावर पाण्याचे नियोजन, वॉटर फिलींग पॉइंट वाढविणे, मोबाईल टॉयलेट, वृक्षारोपन याबाबत राजाभाऊ चोपदार यांनी मुद्देसुद मार्गदर्शन केले.
दरम्यान बैठकीपुर्वी जिल्हाधिकारी श्वेता सिंघल व पालखी सोहळा मालक बाळासाहेब आरफळकर, पालखी सोहळा प्रमुख ड. विकास ढगे पाटील व चोपदार फौंडेशनचे अध्यक्ष राजाभाऊ चोपदार यांच्यासह सातारा, खंडाळा, फलटण येथील अधिकारी यांनी निरा नदीवर माऊलींच्या पादुकांना जेथे स्नान घातले जाते तेथून बरड पर्यंत जिल्ह्यातून जाणार्‍या पालखी मार्गाची व पालखी तळाची प्रत्यक्ष भेट देऊन पाहणी केली. त्याचबरोबर पालखी सोहळ्यात वारकर्‍यांना देण्यात येणार्या सोयी व सुविधांची प्रत्येक विभागाने केलेल्या तयारीची पाहणी करुन आवश्यक त्या सुचना केल्या.
