कळंबी येथे रहिमतपूर येथील एकाचा खून

औंध : कळंबी, ता. खटाव येथे रहिमतपूर येथील व्यावसायिक रविराज बाळकृष्ण लोखंडे (वय 41) यांचा बुधवारी रात्री अज्ञात इसमाने धारदार शस्त्राने वार करून खून केल्याने औंध परिसरात एकच उडाली असून हा खून नेमका कोणत्या कारणामुळे झाला याचा उलगडा न झाल्याने याबाबत गूढ निर्माण झाले आहे.
याबाबत मिळालेली अधिक माहिती अशी, रविराज लोखंडे हे मागील काही वर्षापासून औंध, पुसेसावळी परिसरात बेकरी प्रॉडक्ट विकण्याचे काम करत होते.ते आपल्या वाहनातून फिरुन हे प्रॉडक्ट विकत असत. बुधवारी रात्री ते आपले काम आटोपून टेंम्पोने परत कळंबी मार्गे रहिमतपूरकडे निघाले असता कळंबीनजिकच्या एका दुध डेअरीजवळ त्यांचे वाहन अडवून त्यांच्यावर हल्ला करून अज्ञात इसमांनी सपासप वार करून त्यांना जखमी केले. ही घटना समजताच कळंबी ग्रामस्थांनी त्याठिकाणी गर्दी केली होती.
यामध्ये ते गंभीर जखमी झाले त्यानंतर त्यांना औंध ग्रामीण रुग्णालयात उपचारासाठी आणले असता उपचारादरम्यान त्यांचा मूत्यू झाला. दरम्यान, या घटनेची फिर्याद सुनील लोखंडे यांनी औंध पोलीस स्टेशनमध्ये दिली आहे. घटनास्थळी उपविभागीय अधिकारी बी. बी. महामुनी यांनी भेट दिली आहे. घटनेचा अधिक तपास सपोनि उत्तम भापकर करीत आहेत.