शरद पवार यांच्यावरील कारवाईच्या निषेधार्थ औंध व गोपूज येथील सर्व व्यवहार बंद ठेऊन पाठींबा

औंध: राष्ट्रवादी काँग्रेसचे ज्येष्ठ नेते शरद पवार यांच्यावर शिखर बँक घोटाळा प्रकरणी सक्तवसुली संचलनालय ईडीमार्फत करण्यात आलेल्या कारवाई प्रकरणी औंधसह गोपूूूज व परिसरात सर्व आर्थिक व्यवहार, बाजारपेठ बंद ठेऊन नागरिकांनी या कारवाईचा निषेध केला.
शिखर बँक घोटाळयामध्ये शरद पवार यांचा कोणताही संबंध नसताना ते बँकेचे संचालक नसताना तसेच त्यांचा कोणताही थेट सहभाग यामध्ये नसताना ईडीमार्फत केल्या जात असलेल्या कारवाईचा औंधसह परिसरातील अनेक गावांमध्ये निषेध करण्यात आला तसेच शासनाच्या मुस्कटदाबी धोरणाबद्दल तीव्र संताप व्यक्त करण्यात आला.
यावेळी औंध येथील नवीन व जुने बसस्थानक परिसर तसेच गावातील सर्व दुकाने बंद ठेवण्यात आली होती .यावेळी खाजगी वाहतूक सेवा बंद ठेवली होती.
अत्यावश्यक सेवा, शाळा, काँलेज, आरोग्य विभाग ,बँका, पोस्ट कार्यालय वगळता या बंदमध्ये समाजातील सर्व घटक सहभागी झाले होते.बंदमुळे सर्वत्र शुकशुकाट जाणवत होता.
दरम्यान औधसह परिसरातील अनेक गावांमध्ये या बंदचा परिणाम झाला होता.
बंदमुळे वाहतूक व्यवस्था कोलमडली होती तसेच औंध पोलिसांनी ठिकठिकाणी चोख पोलीस बंदोबस्त ठेवला होता.