मलकापुरातील समस्यांबाबत विरोधक आक्रमक

नगराध्यक्षांसह मुख्याधिकार्‍यांना दिले निवेदन; आंदोलन करण्याचा इशारा
कराड: मलकापूर शहरातील कचरा, डेंग्यूची साथ, रखडलेली भुयारी गटर योजना व शहरातील रस्त्यांबाबत होत असलेल्या त्रासामुळे नागरिक संतप्त झाल्याचे सांगत दक्षता व अन्याय निवारण समितीने नगराध्यक्ष निलम येडगे व मुख्याधिकारी संजीवनी दळवी यांच्यासमोर आक्रमक होत समस्यांचा पाढा वाचला. यावर योग्य त्या उपायोजना कराव्यात अन्यथा आंदोलन केले जाईल, असा इशारा देत याबाबत निवेदन नगरपालिकेला देण्यात आले आहे
निवेदनात म्हटले आहे की, मलकापूरमध्ये अनेक ठिकाणी कचर्‍याचे ढीग आहेत. स्वच्छ व सुंदर मलकापूर म्हणजे कचर्‍याचे ढीग, दुर्गंधी व डासांचा वावर हे समीकरण आहे का. शहरातील रस्त्याच्या कडेला असलेल्या गटरमध्ये कचर्‍याचे ढीग प्लॅस्टिक पिशव्या अस्ताव्यस्त पडलेल्या दिसून येतात. ठिकठिकाणी कचरा साचलेला दिसून येतो. रस्त्यावर पाणी साचून डबकी निर्माण झाली आहेत. अनेक रस्ते पहिल्याच पावसात उखडलेले आहेत.
पावसाचे पाणी गटरमध्ये तुंबून त्या ठिकाणी डांसाची उत्पत्ती होत आहे. त्या पाण्यामध्ये डेंग्यू, मलेरिया सारख्या डांचाची पैदास झपाट्याने होत आहे. त्यामुळे नागरिकांच्या जिवाला धोका निर्माण झाला आहेे. शहरात डेंग्यू, मलेरिया सदृश्य 110 रुग्ण आढळले आहेत. शहरात साथीचे रोग पसरत आहेत. लोक स्वच्छते अभावी आजारी पडायला लागले आहेत.
स्वच्छता करणारे कर्मचारी फक्त मुख्य रस्त्यांवरील स्वच्छता करतात. असे हे मलकापूर स्वच्छ व सुंदर म्हणावे का. असा प्रश्‍न पडतो. स्वच्छतेसाठी 69 कर्मचारी गेली दोन-तीन वर्षे कंत्राटी पध्दतीवर कंत्राटदाराकंडे मजुरीवर काम करतात.
कंत्राटदाराला दरवर्षी एक कोटी एकवीस लाख रुपये दिले जात आहेत. गेली सहा वर्षे सांडपाणी वाहून नेण्यासाठीची भुयारी गटर योजनेचें काम सुरु आहे. साठ कोटी खर्च झाले पण योजना अपूर्णच आहे. त्यामुळे गटार भरुन तुंबली आहेत. नगरपरिषदेचा सर्वच बाबतीत अनागोंदी कारभार चाललेला दिसून येतो. शहरातील नागरिकांची काळजी घ्या, अन्यथा आम्हाला आंदोलन करावे लागेल, असा इशाराही समितीने दिला आहे.
योवळी अशोकराव थोरात, दिनेश रैनाक, सुरज शेवाळे, राजू मुल्ला, भास्कर सोळवंडे, प्रशंात गावडे, विक्रम चव्हाण, अजित थोरात, नंदकुमार बागल, आण्णासाहेब काशीद, प्रशांत चांदे, शहाजी पाटील, शंकर बेले, संतोष हिंगसे, जमीर शेख, सूर्यकांत खिल्लारे उपस्थित होते.
नगराध्यक्ष निलम येडगे, मुख्याधिकारी संजीवनी दळवी यांच्यासह राजेेंद्र यादव यांनी शहरात केलेल्या उपाययोजना बाबत माहिती दिली.