वनमजुरांच्या वेतन रकमेचा गैरवापर: नाना खामकर

कराड : सह्याद्री व्याघ्र प्रकल्पातील वनमजुरांची थकीत असणारी वर्षभराच्या वेतनाची रक्कम कोल्हापूर वरिष्ठ कार्यालयाकडून प्रकल्पाच्या कराड कार्यालयाकडे वर्ग केली. मात्र , त्या रक्कमेतून वनमजुरांचे थकीत वेतन अदा न करता मार्च एन्डला ती रक्कम साहित्य खरेदी व ठेकेदारांची बिले देण्यासाठी वापरल्याची धक्कादायक माहिती समोर आली आहे, अशी माहिती पर्यावरणपे्रमी व सामाजिक कार्यकर्ते नाना खामकर यांनी दिली.
खामकर म्हणाले, साहित्य खरेदीत मिळणारे कमिशन व ठेकेदारांकडून मिळणार्‍या टक्केवारीमुळे वनमजुरांचे वेतन अदा न करता रक्कम इतरत्र वळविण्यात आली आहे. सह्याद्री व्याघ्र प्रकल्पाच्या कराड कार्यालयाचे विभाजन झाले. आहे. एक एप्रिलपासून चांदोली व कोयना असे दोन विभाग केले आहेत. या संधीचा फायदा घेऊन मार्च एन्डला भानगडी केल्या आहेत. भविष्यात एका कार्यालयाची दोन कार्यालये हेाणार हे पाहून एका लेखापालाकडून रकमेच्या वापरात भानगडी घडवून आणल्या आहेत. वरिष्ठांची मर्जी सांभाळणारे हे लेखापालच उपसंचालक असल्याच्या थाटात काम करतात, अशी कुजबूज वनमंजुरांकडून ऐकायला मिळते आहे. कोल्हापूरस्थित वरिष्ठ कार्यालयाकडून थकीत वेतनाची रक्कम सह्याद्री व्याघ्र फाउंडेशनकडून कराड कार्यालयाकडे वर्ग केली. मात्र, संबंधित रक्कम अन्यत्र वापरली गेली. वारंवार वेतनाची मागणी करणार्‍या काही वनमजुरांना कामावरून कमी केले आहे. तसेच वनमजुंराच्या व्हाउचरवर सह्या घेऊन प्रत्यक्षात वेतन अदा केलेले नाही. या सर्व बाबींची चौकशी करून संबंधितांवर कारवाई व्हावी. अशी मागणी कामगार वर्गातून होत आहे.
सह्याद्री व्याघ्र प्रकल्पातील सर्व वनक्षेत्रपालही वरिष्ठांची मर्जी संपादन केलेल्या या लेखापालाला कंटाळले आहेत. त्यांच्या कार्यक्षेत्रातही हा लेखापाल हस्तक्षेप करून ठेकेदार व पुरवठादारांची बिलेही सहायक वनसंरक्षकांकडे न पाठवता थेट उपसंचालक कार्यालयाकडे मागवून बिले अदा केली जातात. ही बाब गंभीर आहे. या कामांची पडताळणी करण्याचे प्रमुख काम सहायक वनसंरक्षकांचे असते. परंतु, त्यांना डावलून थेट उपसंचालक कार्यालयाकडून बिले अदा होतात. ही बाब चुकीची आहे व त्या पाठीमागे वारिष्ठांची मर्जी संपादन केलेेल्या या लेखापालाची भूमिका महत्वाची आहे. वनमजुरांचे थकीत वेतन लवकरात लवकर अदा न केल्यास कराड कार्यालयासमोर उपोषणाला बसणार असल्याचेही खामकर यांनी सांगीतले व संबंधित लेखापालांची तातडीने बदली करावी, अशी मागणी केली आहे.