स्कॉर्पिओ पलटी झाल्याने एक ठार तर एक जखमी

म्हसवड : कारखेल (ता. माण) येथे स्कॉर्पिओ गाडी पलटी झाल्याने सुनील मारुती अहिवळे हे जागीच ठार तर चालक जखमी झाल्याची घटना घडली आहे.
याबाबत अधिक माहिती अशी, खुडूस ता.माळशिरस, जि. सोलापूर येथील सुनील मारुती अहिवळे (वय 45 वर्षे) व पत्नी सुवर्णा हे दोघे कारखेल (ता. माण) असे तिघेजण स्कॉर्पिओ क्रमांक एम एच 10 ए ई 9475 ने म्हसवडकडे येत होते. सदरची स्कॉर्पिओ गाडी कारखेल (ता.माण) येथे सुवर्णा हिचे बहिणीस भेटण्यास निघाले होते. गाडी कारखेल येथे आली असता गाडी पलटी झाली.सध्या म्हसवड- माळशिरस रस्त्याचे काम सुरू आहे.
हे काम अत्यंत धीम्या गतीने सुरू आहे, शिवाय आवश्यक तेथे अपघात होऊ नये याची खबरदारी न घेतल्याने सदरची घटना घडल्याचे परिसरातील लोकांनी सांगितले.
स्कॉर्पिओ गाडी पलटी झाल्याने गाडीतील सुनील मारुती अहिवळे हा जागीच ठार झाला तर गाडी चालक गब्बरसिंग माणिक गायकवाड हा जखमी झाला आहे. त्यास उपचारासाठी म्हसवड येथील प्राथमिक आरोग्य केंद्रात दाखल करण्यात आले.
सदरची घटना समजताच कारखेल गावचे पोलीस पाटील मंगेश लोखंडे यांनी घटनास्थळी भेट दिली व त्वरित म्हसवड पोलिसांना या अपघाताची कल्पना दिली. म्हसवड पोलीस ठाण्याचे पोलीस उपनिरीक्षक शहाजीराजे गोसावी यांनी तातडीने घटनास्थळी भेट दिली.