सातार्‍यात 25 लाखांचा गुटखा जप्त

सातारा: शहापूर (ता.सातारा) येथे पेट्रोलिंग करत असताना पोलिसांना एक संशयास्पद टॅम्पो आढळून आला. पोलीसांनी त्या टेंम्पोची चौकशी केली असता टॅम्पोमध्ये 20 लाख 28 हजार 600 रूपयांचा गुटखा विक्रीसाठी जात असल्याचे सापडून आले. पोलिसांनी टेम्पोचालक राहूल वामन माने (वय 29 वर्षे) रा. शहापूर ता.जि. सातारा यास ताब्यात घेतले. तसेच टेम्पोसह गुटख्याचा माल जप्त केला.
याबाबत अधिक माहिती अशी की, गुटखा विक्रीला महाराष्ट्र शासनाने बंदी घातली आहे. असे असताना सातार्‍यातील शहापूर येेथे सुमारे 20 लाख 28 हजार 600 रूपयांचा गुटखा विक्रीसाठी जात असल्याची माहिती पोलीसांना खबर्‍यामार्फत मिळाली. पोलीसांनी सापळा रचला असता पोलिसांना हा गुटख्याचा टेंम्पो मिळून आला.
तेजस्वी सातपुते पोलीस अधिक्षक सातारा, धीरज पाटील अप्पर पोलीस अधिक्षक सातारा तसेच मा. समीर शेख सहाय्यक पोलीस अधिक्षक सातारा यांनी जिल्हामध्ये अवैद्य गुटखा बाळगणारे विरूध्द कारवाई करण्याबाबत मोहिम राबवण्याचे सुचना दिल्याने त्याप्रमाणे सजन हंकारे पोलीस निरीक्षक सातारा तालुका पोलीस ठाणे यांना त्यांचे खास बातमीदारामार्फत माहिती मिळाली की, शहापूर ता.जि.सातारा गावी गोवा गुटख्याची वाहतूक होणार आहे. अशी खात्रीशीर माहिती प्राप्त झाल्याने त्यांनी त्यांचकडील डी.बी. पथकातील पो.हवा. राजू मुलाणी, पो.हवा. दादा परिहार, पो.ना.सुजीत भोसले, पो.कॉ. रमेश चव्हाण, पो.कॉ. संदीप कुंभार यांना सदरबाबत माहिती घेवून कारवाई करणेबाबत सांगितलेने सदर पथकातील पोलीस कर्मचारी यांनी मिळाले माहितीप्रमाणे शहापूर भागामध्ये याठिकाणी पेट्रोलिंग करीत असताना आयशर टेम्पो क्र. एम.एच.11 ए.एल.3653 यास थांबवून त्याचे हौदयामध्ये तपासणी केली असता त्यामध्ये गोवा गुटखाचे पांढरे रंगाचे एकूण 14 पोती मिळून आली. सदर वाहनचालक राहूल वामन माने (वय 29 वर्षे) रा. शहापूर ता.जि. सातारा याने सदरचा माल विक्रीसाठी आणलेला असल्याचे माहिती दिली. सदरचा माल, आयशर टेम्पो, आरोपी यास ताब्यात घेवून पोलीस ठाणेस आणण्यात आला. सदरचा गुटखा हा 20,28,600/- रूपये किंमतीची असून आयशर टेम्पो 5 लाख रूपये किंमतीचा असा एकूण 25,28,600/- रुपये किंमतीचा मुद्देमाल जप्त करण्यात आलेला आहे.
सदरबाबत अनिल अरूणराव पवार वय 34 वर्षे अन्न सुरक्षा अधिकारी अन्न औषध प्रशासन विभाग सातारा यांनी फिर्याद दिली आहे. सदर गुन्हयाचा तपास वर्षा देसाई महिला पोलीस उपनिरीक्षक सातारा तालुका पो.ठाणे हे करीत आहेत.