कास पठार नजिक बिबट्याचा मुक्त संचार, वन क्षेत्रात अतिक्रमणाचा परिणाम

सातारा : सातारा जिल्ह्यातील जागतिक पर्यटन स्थळ म्हणून नावारूपाला आलेले कास पठार आहे. या ठिकाणी वाढत्या अतिक्रमणाने जंगली प्राणी आता रस्त्यावर उतरू लागले आहेत. देवकड गावच्या हद्दीत रस्त्यावरच बिबट्याच्या मुक्त संचार होत असल्याचे स्पष्ट झाले आहे.
कास पठार भोवती तारेचे कुंपण घातले आहे. तसेच तळ्यानजिक जाण्यासाठी भक्कम रस्ता तयार केला नाही. त्यामुळे जंगली प्राण्याने पारंपरिक पद्धतीने असलेल्या वाटा बंद करण्यात आल्या आहेत.पर्यटनाच्या नावाखाली सिमेंटचे जंगल उभारले गेले आहे. काही भूमिपुत्र, शासकीय अधिकारी, उधोगपती यांच्या अभद्र आघाडीने कास पठार म्हणजे आव जावं, पठार तुम्हारा, झाले आहे. पूर्वी वर्षातून दोन ते तीन वेळा रस्त्यावर गवा या प्राण्यांचे दर्शन घडत होते.
आता प्रमुख रस्त्यावर मोठा धडदाकट बिबट्याचे रात्रीच्या वेळी अंधारात दर्शन झाल्याने त्या ठिकाणी गेलेल्या पर्यटकांना अक्षरशा घाम फुटला होता. त्यांनी मोठ्या धाडसाने त्याचे चित्रीकरण करून सर्वांना माहिती दिली. त्यानंतर आज सकाळ पासून वनविभागाने त्या बिबट्याचा शोध घेतला पण, त्याला सायंकाळ पर्यंत यश मिळाले नाही. कास पठार परिसरातील अनेक भूमिपुत्र हे नोकरी, व्यवसायानिमित्त दर दिवशी सातार्‍यात ये जा करतात. दुचाकी व सायकल चालवून येणार्‍या लोकांची ही संख्या लक्षणीय आहे. अशा वेळी बिबट्या च्या दर्शनाच्या बातमीने अनेकांची झोप उडाली आहे. सध्या पर्यटनाचा मौसम कमी झाला असला तरी सुटीच्या दिवशी काही हौशी पर्यटक येतात. त्यांच्या जिवितास धोका निर्माण होण्याची शक्यता नाकारता येत नाही. यावर कायम स्वरूपी उपाय योजना आखली पाहिजे अशी मागणी पर्यटकांनी केली आहे.