सातारा – जावलीतील मंजूर कामे तातडीने सुरु करा: आ. शिवेंद्रसिंहराजे

सातारा: लोकसभा निवडणूक संपली असून आचारसंहिता शिथिल झाली आहे. यामुळे सातारा- जावली विधानसभा मतदारसंघात यापुर्वीच मंजूर असलेली पाणीपुरवठा, रस्ते बांधकाम, बंधारे, आरोग्य केंद्रे, शाळा खोल्यांचे बांधकाम, घरकुले बांधकाम व अन्य विकासकामे तातडीने सुरु करा. तसेच प्रशासकीय मान्यता मिळालेल्या विकासकामांची निविदा प्रक्रिा ताबडतोब राबवून ही सुध्दा कामे तातडीने पुर्णत्वास न्या, अशा सक्त सुचना आ. श्रीमंत छ. शिवेंद्रसिंहराजे भोसले यांनी सातारा- जावली तालुक्यातील विविध शासकीय विभागांच्या अधिकार्‍यांना केल्या.
सातारा आणि जावलीतील विकासकामांचा आढावा घेण्यासाठी आ. शिवेंद्रसिंहराजे यांनी सोमवारी दुपारी बैठक बोलावली होती. या बैठकीला सार्वजनिक बांधकाम विभाग (जावली) सहायक अभियंता कृष्णा निकम, बी. आर. कोळी, सातारा बांधकाम विभागाचे शाखा अभियंता आर. आर. आंबेकर, जिल्हा परिषदेच्या बांधकाम विभागाचे के. आर. ङ्गडतरे, एम. एस. घाडगे, जावली पंचायत समितीचे गटविकास अधिकारी नारायण घोलप, आर. जी. कुलकर्णी, जावलीचे तालुका आरोग्य अधिकारी डॉ. बी. आर. मोहीते, सातारा तालुका आरोग्य अधिकारी डॉ. एस. वाय. कारखानिस, सातारा पंचायत समितीचे सहायक गटविकास अधिकारी एस. के. ढमाळ, कृषी अधिकारी डॉ. एस. आर. शिंदे, विस्तार अधिकारी बी. एन. केवटे, जावलीचे गट शिक्षणाधिकारी रमेश चव्हाण यांच्यासह सर्व विभागाचे विभागप्रमुख आणि त्यांचे सहायक अधिकारी, जिल्हा परिषदेचे माजी सदस्य राजू भोसले आदी उपस्थित होते.
आ. शिवेंद्रसिंहराजे यांनी सातारा- जावली मतदारसंघात आमदार ङ्गंड, जिल्हा नियोजन समिती, कोयना भुकंप पुर्नवसन, डोंगरी विकास, नाबार्ड, घरकुल योजना आदी विविध योजनांमधून सुरु असलेल्या आणि नव्याने मंजूर करण्यात आलेल्या विकासकामांचा आढावा त्या- त्या विभागाच्या अधिकार्‍यांकडून घेतला. तसेच प्रत्येक कामाची सद्यपरिस्थिती काय हे जाणून घेवून कामे तातडीने पुर्ण करणे, कामे दर्जेदार होणे याकडे जातीने लक्ष देण्याच्या सुचना आधिकार्‍यांना केल्या. लोकसभेच्या आचारसंहितेचा विषय संपला असल्याने आचारसंहितेमुळे अडकलेली कामे तातडीने सुरु करा. जी कामे मंजूर होती ती तातडीने पुर्णत्वास न्या. ज्या कामांना प्रशासकीय मान्यता मिळाली आहे त्या कामांची निविदा प्रक्रीया राबवून ही कामे सुध्दा विधानसभेची आचारसंहिता लागू होण्यापुर्वी पुर्ण झाली पाहिजेत, अशा सक्त सुचना आ. शिवेंद्रसिंहराजे यांनी बैठकीत केल्या.
परळीकडे डोंगरी भाग असला तरी जाण्यायेण्यासाठी चांगला रस्ता आहे, वाहने आहेत. त्यामुळे शिक्षकाविना शाळा ठेवू नका. ज्या शिक्षकांची नेमणुक ज्या शाळेत आहे, त्याच शाळेत त्या शिक्षकाने काम करावे, अशा सुचना आ. शिवेंद्रसिंहराजे यांनी शिक्षण विभागाच्या अधिकार्‍यांना केल्या.
जावलीतील टंचाई आणि ग्रामीण पेयजल पाणीपुरवठा योजनेचा आढावा घेताना ज्या पाणीपुरवठा योजना प्रादेशिक पाणीपुरवठा योजनेत अडकल्या आहेत त्यांची सविस्तर माहिती मला द्या. मार्ली पाणीपुरवठा योजनेबाबतही सविस्तर टिपणी द्या. येत्या अधिवेशनात खास बाब म्हणून या योजनांना मंजूरी घेवू, असे आ. शिवेंद्रसिंहराजे म्हणाले. ज्या कामांमध्ये प्रशासकीय अडचणी येत असतील त्या कामांच्याही बाबतीत मंत्रालयीन पातळीवर पाठपुरावा करुन सर्व कामे मंजूर करुन घेतली जातील, असेही आ. शिवेंद्रसिंहराजे म्हणाले. टंचाईग्रस्त गावांना टँकरने पाणीपुरवठा करा. त्यात कुठेही कमी पडू नका, असेही ते म्हणाले. मंजूर रस्त्यांची कामे तातडीने पुर्ण करा. पावसाळा जवळ आला आहे त्यामुळे रस्त्यांचे खड्डे भरणे आणि सुरु असणारी रस्त्यांची कामे तातडीने पुर्ण करणे याकडे लक्ष द्या. पावसापुर्वी सर्व कामे करा आणि जनतेची गैरसोय टाळा अशी सुचना आ. शिवेंद्रसिंहराजे यांनी बांधकाम विभागाच्या अधिकार्‍यांना केली.
सातारा जावली मतदारसंघात विकासकामे करताना सर्वच विभागाच्या अधिकार्‍यांचे चांगले सहकार्य नेहमीच मिळते. यावेळीही सर्वांनी सहकार्य करुन सर्वप्रकारची कामे दर्जेदार करुन तातडीने पुर्ण करावीत, असे आवाहन आ. शिवेंद्रसिंहराजे यांनी उपस्थित अधिकार्‍यांना केले.