स्पंदन चॅरिटेबल ट्रस्टच्या अहवालाचे प्रकाशन

तळमावलेः पाटण तालुक्यातील डाकेवाडी (काळगांव) येथील स्पंदन चॅरिटेबल ट्रस्ट वसा सामाजिक बांधिलकीचा हे ब्रीद वाक्य घेवून कार्य करत आहे. या संस्थेने केलेल्या कार्य अहवालाचे प्रकाशन नुकतेच विविध क्षेत्रातील मान्यवरांच्या हस्ते केले गेले. स्पंदन चॅरिटेबल ट्रस्ट गेली 4 वर्षापासून समाजामध्ये काम करत आहे. परंतू शुक्रवार दि.4 मे, 2018 या ट्रस्टची रीतसर नोंदणी धर्मादाय आयुक्त कार्यालय सातारा यांचेकडे केली आहे. या नोंदणीपासून स्पंदन चॅरिटेबल ट्रस्टने सामाजिक काम करण्यात आणखी गती घेतली आहे. स्पंदन चॅरिटेबल ट्रस्टचे संस्थापक अध्यक्ष संदीप डाकवे, उपाध्यक्ष आप्पासोा निवडूंगे, सचिव सौ.रेश्मा डाकवे आणि इतर पदाधिकारी यांच्या माध्यमातून आतापर्यंत विविध उपक्रम राबवले आहेत. सर्व उपक्रम हे लोकसहभागातून राबवले आहेत हे या स्पंदन चॅरिटेबल ट्रस्टचे वैशिष्टय मानावे लागेल. आपल्या प्रत्येक कृतीमध्ये समाजाचा हातभार घेतला जातो.
स्पंदन चॅरिटेबल ट्रस्टच्या माध्यमातून आतापर्यंत विद्यार्थ्यांना संगणक/बॅग वाटप, नाम फाऊंडेशनला मदत, वृक्षारोपण, पत्रिकेतून समाजप्रबोधन, मान्यवरांचे स्वागत शाल ऐवजी पुस्तकाने, गणेशमंडळास भेटी देवून मानपत्र, किल्ले बनवा स्पर्धा, 83 चित्रे रेखाटून शुभेच्छा, एक वही एक पेन उपक्रम, विद्यार्थ्यांना मोफत वहया वाटप, एक अक्षर गणेश कलाकृती मदत उपक्रम, गणेशोत्सव वार्तांकन स्पर्धा, माजी सैनिक हणमंत पाटील यांना मदत, एक दिवा जवानासांठी, ग्रंथतुला करुन पुस्तके वाटप, दिवाळी अंक स्पर्धा, एक ओंजळ अनाथांसाठी, कुठरे-जांभूळवाडी शाळेला प्रतिमा वाटप, वारीचे पोस्टर रेखाटून शुभेच्छा, कॅलिग्राफीतून जवानांना सलाम, माणूसकीच्या वहया उपक्रम, अक्षरश्री उपक्रमातून केरळ आपत्तीग्रस्तांना मदत, ऊसतोड मजूरांना शाल वाटप, प्राईड ऑफ स्पंदन अ‍ॅवार्ड, सॅल्युट कार्ड स्पर्धा, सेल्फी विथ गुढी स्पर्धा, ज्ञानाची शिदोरी यासारखे अनेक सामाजिक बांधिलकी जपणारे उपक्रम राबवले आहेत.
अहवाल प्रकाशित करुन स्पंदन चॅरिटेबल ट्रस्टने आपल्या कामाचा आरसा जनमानसांसमोर मांडला आहे.या अहवालाचे वाचन करुन विविध क्षेत्रातील मान्यवरांनी स्पंदन चॅरिटेबल ट्रस्टच्या सामाजिक बांधिलकीचे आणि कार्याचे कौतुक केले आहे.