लोकराज्यच्या फेब्रुवारी अंकाचे मिलिटरी अपशिंगे ग्रामस्थांच्या हस्ते प्रकाशन

सातारा : माहिती व जनसंपर्क विभागामार्फत काढण्यात येणार्‍या लोकराज्य अंकामध्ये मिलिटरी अपशिंगे जिल्हा परिषदेच्या शाळेचा स्मार्ट शाळेची गोष्ट हा लेख प्रसिद्ध झाला आहे. यामुळे आमच्या शाळेचे नाव राज्यपातळीवर गेले आहे. लोकराज्य अंकामध्ये शासनाच्या विविध योजनांची माहिती देण्यात येते. या योजनांचा लाभ घेऊन आम्ही आमच्या गावाचा विकास करु त्यासाठी आम्ही मिलिटरी अपशिंगे हे गाव लोकराज्य ग्राम करणार आहोत, असे आश्वासन आज ग्रामस्थांनी दिले.
माहिती व जनसंपर्क महासंचालनालयातर्फे प्रकाशित करण्यात आलेला माहे फेब्रुवारी 2019 च्या महाराष्ट्र ग्रीटेक प्रकल्प अंकाचे प्रकाशन आज मिलटरी अपशिंगे जिल्हा परिषदेत शाळेतील शिक्षक व ग्रामस्थांच्या हस्ते आज करण्यात आले. यावेळी जिल्हा माहिती अधिकारी युवराज पाटील, सरपंच सारिका गायकवाड, शाळेच्या मुख्याध्यापिका जमेला बागवान, संजय निकम, अजित निकम, पांडूरंग पवार, दिपक नलगे, संजय जाधव, दिनकर निकम, अमृत जाधव यांच्यासह ग्रामस्थ मोठ्या संख्येने उपस्थित होते.
माहिती व जनसंपर्क विभागाचे लोकराज्य मासिक हे देशातील अग्रक्रमांकाचे मासिक आहे. या मासिकामध्ये मिलटरी अपशिंगे शाळेचा लेख प्रसिद्ध झाला असून आता तुमच्या शाळेला भेटी देणार्‍यांची संख्या वाढणार आहे. येथील शिक्षकांची व ग्रामस्थांची आणखीन जबाबदारी वाढली असून शाळेची गुणवत्ता यापुढेही टिकवून ठेवली पाहिजे. मिलिटरी अपशिंगे ही शाळा इतर शाळेना दिशादर्शक ठरेल विश्वास व्यक्त करुन मिलिटरी अपशिंगे हे गाव जिल्ह्यातील पहिले लोकराज्य ग्राम व्हावे यासाठी ग्रामस्थांनी पुढकार घ्यावा, असे आवाहनही जिल्हा माहिती अधिकारी युवराज पाटील यांनी यावेळी केले.
माहे फेब्रुवारी 2019 च्या लोकराज्य अंकात मिलिटरी अपशिंगे या शाळेची स्मार्ट शाळेची गोष्टफ या मथळ्याखाली लेख प्रसिद्ध झाला आहे.
ही आमच्यासाठी अभिमानाची गोष्ट आहे. माहिती व जनसंपर्क विभागाकडून दरमहा प्रकाशित करण्यात येणार्‍या लोकराज्य अंकामध्ये शासनाच्या विविध योजनांची माहिती असते. या माहितीच्या आधारावर आमच्या गावाचा विकास केला जाईल यासाठी आमचे गाव जिल्ह्यातील पहिले लोकराज्य ग्राम करण्याचा निर्धार मिलिटरी अपशिंगे गावचे ग्रामस्थ पांडूरंग पवार यांनी व्यक्त केला.
आमच्या शाळेविषयी लोकराज्य अंकात प्रसिद्ध झालेल्या लेखामुळे इतर जिल्हा परिषदेच्या शाळांकडे पहाण्याचा लोकांचा दृष्टीकोन बदलला जाणार आहे. आमच्या शाळेचा अटल बिहारी वाजपेयी आंरराष्ट्रीय शाळेचा दर्जा मिळण्यासाठी शिक्षक तसेच ग्रामस्थांचा प्रयत्न सुरु आहे. आमच्या शाळेतील 3 री ते 7 वी पर्यंतच्या मुलांची सहल येत्या 19 मार्च रोजी आम्ही विमान प्रवासाने बेंगलोर येथे घेवून जाणार आहेत. बहुदा ही जिल्ह्यातील पहिली जिल्हा परिषद शाळा असेल, असे शालेय व्यवस्थापन समितीचे अध्यक्ष अजित निकल यांनी सांगितले.
मिलिटरी अपशिंगे येथील जिल्हा परिषद शाळेवरील स्मार्ट शाळेची गोष्ट, सुरक्षित कागदपत्रे-सुरक्षित समाज, गाळमुक्त धरण,गाळयुक्त शिवार, स्वच्छता हीच सेवा, नवे तंत्रगतिमान विकास, शेती विकासाचा डिजीटल अध्याय यासह अन्य विषयांवर या अंकामध्ये माहिती प्रसिध्द करण्यात आली आहे.
शासनाचे मुखपत्र असलेले लोकराज्य हे मासिक शहरातील तसेच जिल्ह्यातील बुकस्टॉलवर उपलब्ध आहे. लोकराज्य मासिकाच्या वार्षिक वर्गणीसाठी जिल्हा माहिती कार्यालय, एसटी स्टॅन्ड शेजारी, नवीन प्रशासकीय इमारत, तीसरा मजला, सातारा दूरध्वनी क्रमांक 02162-237440 येथे वार्षिक वर्गणी भरुन लोकराज्यचा अंक घरपोच पोस्टाद्वारे पाठविण्याची सुविधा उपलब्ध आहे.