बामणोली: उपमुख्यमंत्री एकनाथ शिंदे हे दोन दिवसीय दरे दौऱ्यावर आले आहेत. रविवारी (दि. १९) रात्री उशिरा पंढरपूर दौरा आटोपल्यानंतर ते रस्तेमार्गे दरेगावी पोहोचले. यावेळी प्रवासादरम्यान केळघर येथे रविवारी रात्री उशिरा शिवसेना सहसंपर्कप्रमुख एकनाथ ओंबळे, जिल्हा परिषद सदस्या कविता ओंबळे, प्रशांत जुनघरे व शिवसैनिकांनी त्यांचे स्वागत केले.
हा पूर्णपणे खासगी दौरा असून ते विश्रांतीसाठी आल्याची माहिती मिळत आहे. सध्या तापोळा व परिसरात पावसाची संततधार सुरू असल्याने नागरिकांची व पर्यटकांची वर्दळ कमी असून परिसरात शांतता आहे. आज दिवसभर एकनाथ शिंदे यांनी विश्रांती घेणे पसंत केले. त्यांच्या या खासगी दौऱ्याची कानकून कोणालाच नसल्याने आज दिवसभरात कोणीही नेते, शिवसैनिक अथवा नागरिक दरे येथे आले नाहीत. दरवेळी एकनाथ शिंदे गावी आल्यावर शेकडो लोक आपली कामे घेऊन दरे गावी जात असतात. आजचा दिवस त्याला अपवाद ठरला.
भातलावणीत सहभागी होणार?
उपमुख्यमंत्री एकनाथ शिंदे यांची आपल्या मायभूमीशी आणि शेतीशी असलेली नाळ सर्वश्रुत आहे. अधूनमधून ते राजकारणातून वेळ काढत शेतीच्या कामात सहभागी होताना दिसतात. सध्या तापोळा परिसरात भातलावणीचा हंगाम सुरू ते आपल्या शेताच्या बांधावर जाऊन शेतकऱ्यांसोबत भातलावणी करतात का, याकडे लक्ष लागले आहे.
फोटो – केळघर: उपमुख्यमंत्री एकनाथ शिंदे यांचे स्वागत करताना शिवसैनिक.
