व्हिडिओ कॉन्फरन्सच्या संवादाला खासदार-आमदारांच्या वादाचे पडसाद

सातारा : फलटणमध्ये राष्ट्रवादी काँग्रेस पक्षाच्या दि. 22 फेब्रुवारी रोजी झालेल्या संवाद मेळाव्यात दस्तुरखुद्द शरद पवार यांच्यासमोर राष्ट्रवादीच्या गटामध्ये राडा झाला होता. त्यामुळे सातार्‍यात व्हिडिओ कॉन्फरन्सच्याद्वारे बुथ कमिटीशी संवाद साधण्याचा प्रयत्न करण्यात आला. मात्र या व्हिडिओ कॉन्फरन्सच्या संवादाला खासदार-आमदारांच्या वादाचे पडसाद उमटल्याचे दिसून आले. खा. श्री. छ. उदयनराजे भोसले यांनी भाजपमध्ये जावे, अशी इच्छा व्यक्त करणार्‍या त्यांच्या समर्थकांनी या संवादाला पाठ दाखवली.
सातारा जिल्हा मध्यवर्ती बँकेच्या सभागृहात राष्ट्रवादी काँग्रेस पक्षाच्या बुथ कमिटी अध्यक्ष व सदस्यांशी संवाद साधण्यासाठी दस्तुरखुद्द शरद पवार यांनी सातारा जिल्ह्यातील कार्यकर्त्यांना अद्ययावत माहितीसह उपस्थित राहण्याचे आवाहन केले होते. त्याची जय्यत तयारी राष्ट्रवादी जिल्हाध्यक्ष सुनिल माने, सरचिटणीस राजकुमार पाटील, सारंग पाटील, अ‍ॅड. नितीन भोसले, महिला जिल्हाध्यक्षा जयश्री पाटील यांनी केली होती. त्यानुसार आज सातारा-जावली, वाई, महाबळेश्‍वर, फलटण, खंडाळा, कोरेगाव, कराड दक्षिण, कराड उत्तर व पाटण विधानसभा मतदारसंघातील कार्यकर्ते उपस्थित राहिले होते. व्हिडिओ कॉन्फरन्सद्वारे शरद पवार व राष्ट्रवादी प्रदेशाध्यक्ष जयंत पाटील यांनी बुथ कमिटीशी संवाद साधला.
तत्पूर्वी आ. शिवेंद्रराजे भोसले व आ. बाळासाहेब पाटील यांनी वैयक्तिक टीका टिप्पणी करु नये, स्थानिक वादविवादाशी या व्हिडिओ कॉन्फरन्सचा संबंध नाही, वरिष्ठ नेते जी सूचना करतील त्याची अंमलबजावणी करायची आहे, पवारसाहेबांना सातारा जिल्ह्यातील राजकीय परिस्थिती चांगली माहिती आहे. त्यामुळे त्यांचे मार्गदर्शन आपल्यासाठी मोलाचे आहे, अशी सूचना केली होती. या संवाद कार्यक्रमाला राष्ट्रवादीच्या आमदार गटाच्या कार्यकर्त्यांनी खूप मोठी गर्दी केली होती. परंतू राष्ट्रवादीतून खासदारकीची उमेदवारी मागणारे श्री. छ. उदयनराजे भोसले यांचे कट्टर समर्थक उपस्थित राहिले नाहीत. त्यांनी या संवाद कार्यक्रमाला पाठ फिरवून राष्ट्रवादी व शरद पवारांचा अपमान केल्याची भावना राष्ट्रवादीच्या अनेक कार्यकर्त्यांनी उघडपणे बोलून दाखवली. या कार्यक्रमाला खासदार गटाने पाठ फिरवल्यामुळे अनेक खुर्च्या रिकाम्या दिसत होत्या. काही कार्यकर्त्यांना आपण का आलो, याची माहिती नसल्यामुळे त्यांचा चांगलाच गोंधळ उडाला होता. आ. भोसले समर्थक सातारा तालुक्यातील जिल्हा परिषद सदस्याला हा कार्यक्रम नेमका कोठे आहे? हे माहित नसल्यामुळे त्याने जिल्हा बँकेच्या परिसरात फेरफटका मारला, अखेर कदम-कदम बढाये जा, असे अनेकांनी सांगिल्यानंतर ते कार्यक्रमाच्या हॉलमध्ये पोहोचले.