विलासपूर येथील तीन ओढ्यांची साफसफाई व खोलीकरण

सातारा : विलासपूर, ता. सातारा येथील ग्रामपंचायत हद्दीतील वॉर्ड क्र. 2 व 3 मधील तीन ओढ्यांसह नाल्यांची साफसफाई 14 व्या वित्त आयोगातून सुमारे 8 ते 9 लाखाची तरतूद करुन जेसीबीच्या सहाय्याने ओढ्याचे खोलीकरण व स्वच्छता मोहीम सुरु केली.
फॉरेस्ट कॉलनीजवळ जोशी (डावरी) समाजासह इतर समाजाची ओढ्याजवळ स्मशानभूमी आहे. या स्मशानभूमीला कोणताही धक्का न लागता जेसीबी मशिनद्वारे ओढ्यातील प्लॅस्टिक कचरा हटविण्यात आला. या शिवाय झाडे, वेली यांची झालेली रेलचेल दूर करण्यात आली. अंजठा हॉटेल सर्व्हिसरोड पर्यंत ओढ्याचे खोलीकरण व स्वच्छता करण्यात आले. त्या कामासाठी ग्रामसेविका श्रीमती संगीता भोसले, सरपंच बाळासाहेब पिसाळ, उपसरपंच अभय जगताप, ग्रा. प. सदस्य महेश कुलकर्णी, किरण नलवडे, अरविंद विभुते, ग्रा. पं. सदस्या सौ. प्रतिभा मोटे, हेमलता किरवे, फॉरेस्ट कॉलनीतील ज्येष्ठ नागरीक संघाचे अध्यक्ष आर. ए. मोटे, शशिकांत पारेख यांच्यासह ग्रामस्थ परिश्रम घेत आहेत.