खातवळच्या बोलक्या ढोलकीचा मॉरॅशिसमध्ये खणखणाट

वडूज : झी टी.व्ही. मराठी या लोकप्रिय वाहिनीवर ढोलकी झाली बोलकी या कार्यक्रमात सादरीकरण करण्याची संधी मिळालेल्या खातवळ (ता. खटाव) येथील ढोलकीपट्टू रामचंद्र उर्फ बंडू कांबळे, यांच्या ढोलकीचा देशाबाहेर मॉरेसिसमध्येही चांगलाच खणखणाट झाला. मॉरेशिस येथील मराठी कल्चरल ग्रुपच्या वतीने आयोजित केलेल्या कार्यक्रमात कांबळे यांनी उत्कृष्ट पध्दतीने ढोलकीवादन करुन उपस्थितांची चांगलीच दाद मिळविली.
अत्यंत हालाखीच्या परिस्थितीत रामचंद्र कांबळे यांनी शिक्षण घेतले. बालपणापासून त्यांना ढोलकी वादनाची आवड होती. बंडाच्या वयाच्या सातव्या वर्षी वडील मल्हारी कांबळे यांनी आठशे रूपये व्याजाने काढत जुनी ढोलकी घेऊन दिली. गावातील काही ढोलकी वादकांची ढोलकी ऐकून त्याप्रमाणे ढोलकी वाजविण्याचा त्यांनी सराव कायम ठेवला. ढोलकी वादनात एवढे पारंगत नसतानाही त्यांना दातेवाडीच्या श्री विष्णूदेव प्रासादिक नाट्यरूपी भारूड मंडळाचे संस्थापक शंकर महाराज कदम यांनी त्यांच्या प्रासादिक भारूड मंडळात ढोलकी वादनाची संधी दिली. स्वत:च्या आवडीखातर काही वर्षे त्यांनी या मंडळात विना मोबदला काम केले. त्यानंतर वडूज च्या हुतात्मा परशुराम विद्यालयात अकरावी मध्ये शिकत असताना कॉलेजमध्ये त्यांना ढोलकी वादनाची कला सादर करण्याची संधी मिळाली. कॉलेजच्या वार्षिक स्नेहसंमेलनप्रसंगी शाहीर बाबुराव विभूते (सांगली) यांनी त्यांच्या कलापथकात ढोलकी वादनाची संधी दिली. या कलापथकाच्या माध्यमातून त्यांचा देशातील अनेक राज्यांत प्रवास झाला. माजी राष्ट्रपती व राजस्थानच्या तत्कालीन राज्यपाल प्रतिभाताई पाटील यांच्यासमोर त्यांचा ढोलकी वादनाचा झालेला कार्यक्रम चर्चेत आला. जुन्नर येथे झालेल्या राज्यस्तरीय लावणी महोत्सवात त्यांचा पहिला क्रमांक आला होता. तत्कालीन उपमुख्यमंत्री दिवंगत आर. आर. पाटील यांच्या हस्ते त्यांचा गौरव करण्यात आला.
2015 मध्ये लोकशाहीर आण्णा भाऊ साठे जयंतीनिमित्त मुंबईत झालेल्या कार्यक्रमात माजी राज्यमंत्री राम गुंडीले, आण्णा भाऊ साठे समाजसेवा संस्थेचे अध्यक्ष संतोष पवार यांच्या हस्ते त्यांचा समाज गौरव पुरस्कार देऊन सत्कार करण्यात आला. दूरचित्रवाणीवरील
ढोलकी झाली बोलकी या कार्यक्रमात राज्यातील अनेक ढोलकी वादकांमधून महाअंतिम फेरीत दुसऱा क्रमांक पटकविला.
बंडा कांबळे यांच्या ढोलकी वादनाची माहिती मॉरिशसमधील मराठी कल्चरल सेंटरला मिळाली. सेंटरच्यावतीने त्यांना मॉरीशसला ढोलकीवादनासाठी निमंत्रीत करण्यात आले. घरची हालाखीची परिस्थिती असल्याने त्यांचे नाशिक स्थित असणारे कुकुडवाड येथील स्नेही महादेव गुळींग व जवळच्या काही मित्र मंडळींनी त्यांना मॉरीशसला जाण्यासाठी सहकार्य केले. खातवळच्या बंडा कांबळे च्या ढोलकीची थाप मॉरीशसमध्ये पडली. मॉरीशसस्थित मराठी बांधवांनी त्यांच्या ढोलकी वादनाचे मोठे कौतुक केले.