महायुतीच्या उमेदवाराचा रिपाइं स्वतंत्र प्रचार करणार

जिल्हाध्यक्ष अशोक गायकवाड यांची माहिती; प्रचारयंत्रणेत सामावून घेत नसल्याची खंत
सातारा : महायुतीचा उमेदवार रिपाइला विश्वासात घेत नसेल तरी ही केवळ आठवले साहेबांचा सन्मान कमी होवू नये, म्हणून स्वतंत्रपणे उमेदवाराचा प्रचार करणार असल्याची माहिती जिल्हाध्यक्ष अशोक गायकवाड यांनी पत्रकार परिषदेत दिली.
पुढे बोलताना गायकवाड म्हणाले, तीन तारखेला ना. रामदास आठवले सातार्‍यात येवून गेले. त्यानंतर आज 9 तारीख ओलांडली तरी महायुतीचे उमेदवार नरेंद्र पाटील यांनी रिपाइंसह मित्रपक्षांना विचारात घेतले नाही.प्रचारासाठी मित्रपक्षांची कोअर कमिटी तयार केली नाही. उलट भाजप अन शिवसेना यांच्याच बैठका होत आहेत. मात्र, तरी ही केवळ आठवले साहेबांचा सन्मान कमी होवू नये म्हणून रिपाइं स्वखर्चाने प्रचाराला सुरुवात करणार आहे. ठिकठिकाणी स्वतंत्र प्रचार सभांचे आयोजन करणार आहे.
त्याच बरोबर महायुतीचे उमेदवार नरेंद्र पाटील यांच्याकडे आर्थिक चणचण आहे. म्हणून रिपाइं त्यांना 1 लाख रुपयांची मदत देखील करणार आहे. जे रिपाइं कार्यकर्ते महायुतीच्या उमेदवारांविरोधात काम करतील त्यांना पक्षातून काढून टाकले जाईल, असे ही गायकवाड यांनी शेवटी संगितले. यावेळी रिपाइंचे तालुकाध्यक्ष व जिल्हा कार्यकारणीचे पदाधिकारी उपस्थित होते.