किसनवीरच्या मदतीने चिलेवाडीत जलक्रांती घडणारःअमृतराव नलवडे

कोरेगांव : कोरेगाव तालुक्यातील उत्तर भागात दुष्काळी परिस्थितीमुळे शेती व पशुधन धोक्यात आले आहे. अशा कठीण परिस्थितीत किसन वीर कारखान्याचे अध्यक्ष मदनदादा भोसले यांनी क्षणाचाही विलंब न लावता चिलेवाडी गावास जलसंधारण कामासाठी पोकलेन मशीन देऊन केलेल्या मदतीमुळे भविष्यात आम्ही पाणीटंचाईवर निश्‍चितपणे मात करून चिलेवाडीत जलक्रांती घडविणार असल्याचे प्रतिपादन, चिलेवाडीचे ज्येष्ठ नागरिक अमृतराव नलवडे यांनी केले आहे.
किसन वीर साखर कारखाना व्यवस्थापनाने कार्यक्षेत्रातील दुष्काळ व पाणी टंचाईचा सामना करणार्‍या गावातील जलसंधारणाच्या कामांसाठी सामाजिक बांधिलकीतुन पोकलेन मशिन दिले आहे. चिलेवाडी (ता. कोरेगांव) येथील चिलाई मंदिर परिसरात कंपार्ट बंडींग, ओढा रूंदीकरण, माती नाला बंध, जुन्या बंधार्‍यातील गाळ काढण्याच्या कामांचा शुभारंभ करण्यात आला. त्यावेळी ते बोलत होते. यावेळी किसन वीर कारखान्याचे संचालक विजय चव्हाण, सचिन सांळुखे यांची प्रमुख उपस्थिती होती.
नलवडे पुढे म्हणाले, किसन वीर कारखान्याचे अध्यक्ष मदनदादा भोसले यांच्या कल्पक नेतृत्वाखाली कारखाना व्यवस्थापनाने चिलेवाडीत पाणंद रस्ते, ऊसतोडणी संदर्भात नेहमीच सकारात्मक भुमिका ठेवली आहे. या जलसंधारण कामासाठी केलेल्या मदतीमुळे भविष्यात पाणीटंचाईवर मात होण्यास मदत होणार आहे.
यावेळी संचालक विजय चव्हाण म्हणाले, चिलेवाडी ग्रामस्थांनी एकत्र येऊन जलसंधारणाचे काम हाती घेतले आहे, ही आनंददायी बाब आहे. किसन वीर कारखान्याचे अध्यक्ष मदनदादा भोसले यांच्या नेतृत्वाखाली कारखाना व्यवस्थापन जलसंधारण कामांसाठी कायमच मदत करीत आहेत. यापुढील काळातही मदनदादांचे आवश्यक ते सर्व सहकार्य मिळणार असल्याचे सांगुन वॉटर कप स्पर्धेसाठी किसन वीर परिवाराकडून शुभेच्छा दिल्या.
कार्यक्रमाचे स्वागत आणि सुत्रसंचालन अजित खताळ यांनी केले. यावेळी डॉ. दत्तात्रय फाळके, अशोक नलवडे, गणेश ढोले, किरण शेडगे, शहाजी ढोले, दौलत गायकवाड, बळवंत नलवडे, शिवाजी कोकाटे, रंगराव घोरपडे, प्रकाश मोहिते,नारायण सकुंडे यांच्यासह बहुसंख्य ग्रामस्थ व महिलावर्ग मोठ्या संख्येने उपस्थित होते.