उपसरपंचांच्या राजीनाम्याची मागणी; फलटणमध्ये नागरिकांचा मूक मोर्चा

फलटण : फलटण तालुक्यात महत्त्वपूर्ण समजल्या जाणार्‍या तरडगाव ग्रामपंचायतीचे विद्यमान उपसरपंच यांनी महिलेसोबत गैरवर्तन केले असल्याचा गावातील नागरिकांचा आरोप आहे.
सध्या त्यांच्याबद्दल गावातून चांगलाच नाराजीचा सूर उमटत आहे त्यामुळे त्यांनी सामाजिक हित व नैतिक जबाबदारीतुन आपल्या उपसरपंच पदाचा व सदस्य पदाचा राजीनामा द्यावा या मागणीसाठी नागरिकांनी मूक मोर्चा काढून निषेध व्यक्त केला.
ग्रामपंचायत कार्यालयातूनच विकासाची गंगा संपूर्ण गावात पोहोचत असते गावाच्या विकासासाठी येणारा शासनाचा निधी लोकनियुक्त असलेले लोकप्रतिनिधी कार्यालयात बैठक घेऊन निधीचे विकास कामावर वाटप करतात.
यामुळे ग्रामपंचायत कार्यालय हे एक पवित्र मंदिर आहे अशा मंदिरात ज्या व्यक्ती विरोधात समाजात आरोप आहेत त्यांनी पदाचा राजीनामा द्यावा अशा मागणीचे निवेदन नागरिकांनी सरपंच जयश्री चव्हाण यांच्याकडे दिले आहे.
सकाळी नऊ वाजता तरडगाव येथील बस स्थानक येथून मोर्चाला सुरुवात झाली मोर्चा संपूर्ण गावातून ग्रामपंचायत कार्यालय येथे आल्यानंतर मोर्चाची सांगता प्रसंगी काही पदाधिकारी कार्यकर्त्यांनी परखड शब्दात निषेध नोंदवून आदर नसलेल्या पदाधिकार्‍याला पदावर राहण्याचा नैतिक अधिकार नाही त्याचा राजीनामा लवकर घ्यावा अशी मागणी यावेळी केली.
सदर व्यक्तीची गेल्याच महिन्यात उपसरपंच पदी निवड झाली असून यापूर्वी झालेल्या ग्रामपंचायत निवडणुकीसाठी त्याची पडताळणी कशी केली होती. असा सवाल देखील काहीनी उपस्थित केला .तसेच या आंदोलनाच्या पाठीमागे कोणाचा स्वार्थ राजकारण नाही या माध्यमातून आहे.
त्याचबरोबर जर लवकरच उपसरपंच पदाचा व सदस्य पदाचा राजीनामा न दिल्यास अथवा पक्षश्रेष्ठींनी तो न घेतल्यास आंदोलन आणखी तीव्र करू असा इशारा देखील मोर्चातील सहभागी आंदोलकांनी यावेळी दिला.
फलटण कोरेगाव विधानसभा मतदारसंघाचे आमदार दिपक चव्हाण यांचे गाव असलेल्या तरडगाव मध्ये असा प्रकार घडला असुन यात विद्यमान आमदारांनी एक अक्षरही न काढल्या बद्दल नागरीकांच्यातुन नाराजीचा सुर येत आहे.