सहकार विषयाच्या विद्यार्थ्यांची वार्षिक सर्वसाधारण सभेला हजेरी

फलटण: श्रीमती प्रेमलाताई चव्हाण हायस्कूल व ज्युनियर कॉलेज मधील इयत्ता बारावीतील सहकार विषयाच्या विद्यार्थ्यांनी सहकारी संस्थेच्या वार्षिक सर्वसाधारण सभेला उपस्थित राहून सभेच्या कामकाजाचा फलटण तालुका सहकार सहाय्यक निबंधक अधिकारी यांच्या उपस्थितीत अनुभव घेऊन अभ्यास केला.
मराठा विद्या प्रसारक समाज संस्थेच्या श्रीमती प्रेमलाताई चव्हाण हायस्कूल व ज्युनियर कॉलेज मधील इयत्ता बारावीतील विद्यार्थ्यांना सहकार विषयात सहकारी संस्थांच्या सभेचा अभ्यास अभ्यासक्रमात आहे. त्या अनुषंगाने सहकारी संस्थेच्या सभेचा वार्षिक सर्वसाधारण सभेच्या कामकाजाचा अभ्यास करण्यासाठी तेथील सहकार शिक्षक प्रा. सतीश जंगम यांनी श्री सद्गुरू हरिबुवा महाराज नागरी सहकारी पतसंस्था मर्यादित या संस्थेच्या वार्षिक सर्वसाधारण सभेच्या अभ्यासासाठी सभेला विद्यार्थ्यांना बसण्याची लेखी परवानगी घेऊन विद्यार्थ्यांना सभेच्या कामकाजाचा प्रत्यक्ष अनुभव मिळवून दिला.
संस्थेचे संस्थापक अध्यक्ष दिलीपसिंह भोसले यांनी या प्रशालेचे विद्यार्थी गेली आठ-नऊ वर्षे सतत सभेला उपस्थित राहून सभेचा अभ्यास करतात हे निदर्शनास आणून दिले.
फलटण तालुका सहाय्यक निबंधक अधिकारी सुनील धायगुडे यांनी वाढत्या भांडवलशाही वातावरणात सहकार चळवळ टिकविणे व वाढविणे आवश्यक असून त्यासाठी तरुणांनी या सहकार क्षेत्रात आले पाहिजे असे सांगून सहकारी संस्थेच्या वार्षिक सर्वसाधारण सभेच्या अभ्यासासाठी तरुण विद्यार्थी उपस्थित राहिल्याने त्यांना सहकार चळवळी बद्दल आकर्षण निर्माण होईल असे सांगून विद्यार्थी व मार्गदर्शक शिक्षक सतीश जंगम यांचे कौतुक केले. संस्थेचे चेअरमन तेजसिंह भोसले, व्हाईस चेअरमन राजाराम फणसे, व जनरल मॅनेजर संदीप जगताप यांनीही विद्यार्थ्यांना मार्गदर्शन व प्रोत्साहन दिले.सहकारी संस्थेच्या सभेस बसून माहिती घेण्यास परवानगी दिल्याबद्दल शिक्षक सतीश जंगम यांनी सहकारी संस्थाचालकांचे आभार मानले.