लेखी आश्‍वासनानंतर विडणी ग्रामस्थांचे आंदोलन स्थगित

फलटण: विडणी येथील उत्तरेश्वर हायस्कूल व ज्युनिअर कॉलेजमध्ये पूर्णवेळ शिक्षक नसल्यामूळे विद्यार्थ्यांचे शैक्षणिक नुकसान होत असल्याने ग्रामस्थांच्यावतीने शाळा बंद व धरणे आंदोलन शिक्षक व संस्थेच्या लेखी आश्वासन दिल्यावर मागे घेण्यात आले.
विडणी ता.फलटण येथे महात्मा फुले एज्युकेशन सोसायटीचे उत्तरेश्वर हायस्कूल व ज्युनिअर कॉलेज असून या विद्यालयाची स्थापना1972 साली झाली असून या शाळेतून हजारो विद्यार्थांनी शिक्षण घेऊन आपले भविष्य घडविले आहे, विडणी गाव फलटण तालुक्यात सर्वात मोठे लोकसंख्येचे व विकसनशील गाव म्हणून परिचित आहे, या गावात उत्तरेश्वर हायस्कूल व ज्युनिअर कॉलेज ही खासगी शिक्षण संस्था आहे या शाळेत सध्या इयत्ता पाचवी ते बारावी पर्यंत सुमारे 650 मुले मुली शिक्षण घेत असून त्यांना शिकवण्यासाठी 19 शिक्षकवर्ग आहेत,परंतू वयोमर्यादानुसार 9 शिक्षक सेवानिवृत्त झाले असून त्यांच्याजागी संस्थेने तात्पुरत्या स्वरुपात रिक्त शिक्षकांची पदे भरली असून यांची नेमणूक करून जवळपास 5 वर्ष होऊन गेली असून त्यांना शासनमान्य नेमणूकीचे पत्र मिळाले नसल्याने व त्यांना बिनपगारीच काम करावे लागत असल्याने त्यांची विद्यार्थ्याना पूर्णवेळ शिकवण्याची मानसिकता न राहिल्याने ते आपल्या सोईनुसारच कधीतरी येऊन शिकवत असतात त्यामूळे शाळेतील विद्यार्थांचे शैक्षणिक नुकसान अतोनात होऊ लागल्याने मुलांनी आपल्या पालकांना तक्रार केल्याने पालक संस्थेच्या व्यवस्थापना कडे चौकशी करण्यास गेले असता त्यांना अनेकदा व्यवस्थापनाने खोटे नाटे बोलून पालकांची दिशाभूल अनेक महिने केली गेली.
शेवटी पालकांनी व ग्रामस्थांनी संस्थेच्या गैरकारभाराबाबत तीव्र संताप व्यक्त करत आज शुकवार दिनांक 20 रोजी सकाळी 9 वाजता उत्तरेश्वर विद्यालयात विडणी गावातील ग्रामस्थ व पालक यांच्या वतीने शाळा बंद व धरणे आंदोलन करण्याचा पवित्रा घेतल्यावर संस्था व प्रशासन खडबडून जागे झाले.
उत्तरेश्वर विद्यालयाच्या गेटसमोर सुमारे हजाराच्या सख्येने पालक व ग्रामस्थांनी उपस्थिती लावली होती यावेळी जि.प.सातारा येथून माध्यमिक विभागाचे उपशिक्षण अधिकारी रमेश चव्हाण, फलटण पं.स.चे प्रभारी गटशिक्षणधीकारी रमेश गंबरे यांनी आंदोलन स्थळी भेट देऊन पालक व ग्रामस्थांच्या मागण्या ऐकून घेऊन संस्थेचे शाळा कमिटी व बिनपगारी शिक्षक, मुख्याध्यापक यांच्या सोबत चर्चा करुन शाळेचा शैक्षणिक गुणवत्ता दर्जा कायम राखण्यासाठी आम्ही वेळोवेळी शाळेस भेटी देऊन तसा अहवाल तयार केला जाईल तसेच शाळेत कायम स्वरुपी शिक्षक उपस्थित राहून मुलांना चांगल्या प्रकारे शिकवण्यासाठी काम काज करतील असे लेखी हमी पञ आंदोलकांना दिल्या नंतर आंदोलन मागे घेण्यास सांगण्यात आले तसेच संस्थेच्या कामकाजाबाबत देखील सखोल चौकशी करुन दोषी आढल्यास संबंधितावर कारवाई केली जाईल असे सांगून आंदोलनची माघारी घेत असल्याचे जाहीर केले.