औंध संगीत महोत्सवात यंदा दिग्गज कलाकारांची पर्वणी

औंंध: देशासह राज्याच्या ग्रामीण भागात आयोजित केला जाणारा औंध संगीत महोत्सव यंदा शनिवार दि.19 रोजी आयोजित केला जाणार आहे, अशी माहिती शिवानंद स्वामी संगीत प्रतिष्ठानचे सचिव पं. अरूण कशाळकर यांनी दिली. यावेळी विश्वस्त श्रीमती अपूर्वा गोखले, पल्लवी जोशी, सुनील पवार उपस्थित होते. यंदा औंध संगीत महोत्सवाचे 79 वे वर्ष आहे.
ग्रामीण भागात शास्त्रीय संगीत रूजावे व त्याचे महत्त्व वाढावे.चांगले गायक, वादक निर्माण व्हावेत यासाठी ग्वाल्हेर घराण्याचे बुजुर्ग गायक व गुरु गायनाचार्य पं अनंत मनोहर जोशी व त्यांचे पुत्र आंतरराष्ट्रीय ख्यातीचे व्हायोलिन वादक व गायक पं.गजाननबुवा जोशी यांनी आध्यात्मिक गुरु शिवानंद स्वामी यांच्या स्मृती प्रित्यर्थ 1940 सालापासून हा महोत्सव सुरू करण्यात आला.
या संगीत महोत्सवात ज्येष्ठ गायिका माणिक वर्मा, हिराबाई बडोदेकर, पं.भीमसेन जोशी, शिवरामबुवा वझे व अन्य गायक तसेच नामवंत वादकांनी औंध संगीत महोत्सवास उपस्थिती लावली आहे. आज या संगीत महोत्सवाने व्यापक स्वरूप प्राप्त केले आहे. यंदा शनिवार दि.19रोजी तीन सत्रांमध्ये हा संगीत महोत्सव आयोजित केला जाणार आहे. सकाळी 9.30 वाजता माजी आ.प्रभाकर घार्गे यांच्या हस्ते संगीत महोत्सवाचा शुभारंभ केला जाणार आहे. यावेळी औंध संस्थानच्या अधिपती गायत्रीदेवी पंतप्रतिनिधी, सरपंच सोनाली मिठारी, उपसरपंच दिपक नलवडे व विविध मान्यवर उपस्थित राहणार आहेत. पहिल्या सत्राची सुरूवात श्रीमती अपूर्वा गोखले व पल्लवी जोशी यांच्या सहगायनाने होणार आहे. त्यानंतर फारुख लतीफ यांचे सारंगीवादन होणार आहे. ज्येष्ठ शास्त्रीय गायिका डॉ. अलका देव मारूलकर यांच्या गायनाने प्रथम सत्राची सांगता होणार आहे. सकाळी दहा ते दुपारी दोन यावेळेत पहिले सत्र संपन्न होणार आहे.
त्यानंतर दुपारी चार ते रात्री नऊ यावेळेत दुसरे सत्र पार पडणार आहे. या सत्रामध्ये पंडिता शुभदा पराडकर, पं अरूण कशाळकर यांचे शास्त्रीय गायन होणार आहे तसेच यावेळी रात्री आठ वाजता पिंपरी चिंचवड महानगरपालिकेचे आयुक्त श्रावण हर्डीकर यांच्या हस्ते रियाज स्मरणिकेचे प्रकाशन केले जाणार आहे. याप्रसंगी ललिता कला केंद्र पुणे विभागाचे प्रमुख प्रा.डॉ.प्रविण भोळे, रामभाऊ पवार, सरपंच सोनाली मिठारी, उपसरपंच दिपक नलवडे व मान्यवर उपस्थित राहणार आहेत. त्यानंतर संगीत महोत्सवाचे मुख्य आकर्षण असलेले अमीरा पाटणकर यांचे कथ्थक नृत्य होणार आहे.
रात्रीचे शेवटचे तिसरे सत्र दहा वाजता सुरू होणार आहे. यासत्रामध्ये पं.वेंकटेश कुमार, श्रीमती अनुराधा कुबेर, पं. दिनकरबुवा पणशीकर यांचे गायन होणार आहे तसेच पांडुरंग पवार यांचा तबला सोलो व.पं.रुपक कुलकर्णी यांचे बासरी वादन होणार आहे. यावेळी तबला संगत प्रवीण करकरे, पं.अरविंद कुमार आझाद, स्वप्निल भिसे, हार्मोनियम संगत प्रवीण कासलीकर, सिध्देश बिचोलकर करणार आहेत.