माजी नगरसेवक महेश जगतापसह एकाला तिन दिवस पोलीस कोठडी

सातारा: येथील सदर बाझार परिसरामध्ये गुरुवारी सायंकाळी सात वाजण्याच्या सुमारास पार्किंग व बोर्ड लावण्याच्या कारणावरून एकाला मारहाण करून हवेत गोळीबार करणार्‍या संशयित माजी नगरसेवक महेश जगताप सह त्याचा सहकारी विजय दत्तात्रय गोळे (वय 24) रा. प्रनम बंगला पाठीमागे, सदर बाझार, सातारा यांना येथील जिल्हा न्यायालयात हजर केले असता न्यायालयाने त्यांना तिन दिवसांची पोलीस कोठडी ठोठावली.
याबाबत पोलिसांनी दिलेली माहिती अशी, विक्रम रसाळ यांनी सदर बाझार, सातारा येथील अक्षय ब्लड बँकेच्या पाठीमागे असणार्‍या आर. एम. क्लेम या बिल्डिंगमध्ये भाड्याची जागा घेऊन विक्रम कम्प्युटरची शाखा सुरू केली होती. या बिल्डिंगच्या समोर एका डॉक्टरचे क्लिनिक असून संबंधित डॉक्टर आणि विक्रम रसाळ यांच्यामध्ये पार्किंग आणि बोर्ड लावण्याच्या कारणावरून वाद सुरू होते. ही बाब संबंधित डॉक्टरने संशयित माजी नगरसेवक महेश जगताप यांच्या कानावर घातली होती.
दरम्यान सायंकाळच्या सुमारास महेश जगताप यांनी विक्रम कम्प्युटरमध्ये जाऊन विक्रम रसाळ याला दमदाटी करीत त्याच्या डोक्याला पिस्तूल लावून त्याला खाली आणले तद्नंतर संबंधित डॉक्टरची माफी मागण्यास भाग पाडले विक्रम रसाळ यांनी माफी मागितली नंतर त्याला मारहाण करीत धमकी देत पिस्तूलमधून हवेत गोळीबार केला होता. या घटनेमुळे परिसरात खळबळ उडाली होती.
या घटनेची माहिती मिळताच जिल्हा पोलीस अधीक्षक तेजस्वी सातपुते, सह पोलीस अधीक्षक समीर शेख यांनी घटनास्थळी भेट देऊन पाहणी केली. संशयित महेश जगताप हा त्याच्या घरातच सापडल्याने त्याच्यासह त्याचा साथीदार विजय दत्तात्रय गोळे (वय 24) रा. प्रनम बंगला पाठीमागे, सदर बाझार, सातारा यांना ताब्यात घेऊन अटक केली होती. त्यांना आज येथील जिल्हा न्यायालयापुढे हजर केले असता न्यायालयाने त्यांना दोन दिवसांची पोलीस कोठडी ठोठावली.