स्वच्छ सर्वेक्षणात फलटण टॉप 10 मध्ये आणावा : रामराजे नाईक निंबाळकर

फलटण: केंद्र व राज्य शासनाच्यावतीने आपले शहर व आपला परिसर स्वच्छ रहावा यासाठी राबविण्यात येत असलेल्या स्वच्छ सर्वेक्षण अभियानात गतवर्षी फलटण नगरपालिकेने 72 वा क्रमांक पटकावला होता, मात्र झालेल्या चुका सुधारुन स्वच्छ सर्वेक्षण अभियानात फलटण शहराचा क्रमांक टॉप 10 मध्ये आणावा अशी अपेक्षा व्यक्त करतानाच आपण सद्यस्थितीत फलटण शहराच्या स्वच्छतेबाबत समाधानी नसल्याचे स्पष्ट प्रतिपादन विधान परिषद सभापती श्रीमंत रामराजे नाईक निंबाळकर यांनी केले.
फलटण नगरपालिका नवीन प्रशासकीय इमारतीमधील श्रीमंत संजीवराजे नाईक निंबाळकर सभागृहात आयोजित बैठकीत मार्गदर्शन करताना श्रीमंत रामराजे बोलत होते. यावेळी नगराध्यक्षा निताताई मिलिंद नेवसे, मुख्याधिकारी प्रसाद काटकर, नगरसेवक पांडुरंग गुंजवटे, नगरसेविका श्रीमंत सुभद्राराजे नाईक निंबाळकर, आरोग्य विभागाचे सभापती अजय माळवे, नगरसेवक विक्रम जाधव, सार्वजनिक बांधकाम समिती सभापती अ‍ॅड. मधुबाला दिलीपसिंह भोसले, वैशाली चोरमले, दिपाली निंबाळकर, आरोहणमच्या सरोज बडगुजर यांची प्रमुख उपस्थिती होती.
श्रीमंत रामराजे पुढे म्हणाले, फलटण शहराच्या स्वच्छतेबाबतीत कमिन्समधील उच्चस्तरीय अधिकारी नाराज असून आगामी काळामध्ये फलटण शहर स्वच्छ ठेवण्याची जबाबदारी कमिन्स बरोबरच आपल्याला घेणे गरजेचे आहे. कमिन्स कंपनी शहरातील सार्वजनिक स्वच्छता गृहांची स्वच्छता ठेवण्याची जबाबदारी स्वीकारण्यास तयार आहे परंतू आताच्या परिस्थितीत नगरपालिकेने सर्व स्वच्छता गृह स्वच्छ करावीत, तेथे मुबलक पाण्याची व्यवस्था कायमस्वरुपी करावी अशी अपेक्षा त्यांनी व्यक्त केली आहे.
शहरात रिंग रोडवर उभारलेल्या दुभाजकामध्ये वृक्षारोपण करुन त्याची निगा कमिन्सने राखावी अशी सूचना करतानाच शहरातील स्वच्छतेची कामे वेळेत पूर्ण करुन जनजागृती करावी असे आदेश यावेळी श्रीमंत रामराजे नाईक निंबाळकर यांनी नगराध्यक्षा व त्यांच्या सहकार्‍यांसह प्रशासनाला दिले.
आरोग्य सभापती अजय माळवे म्हणाले, शहरात ज्या ठिकाणी उघड्यावर कचरा टाकला जातो, त्या ठिकाणी जनजागृती करावी मात्र तरीही कचरा टाकला गेला तर तेथे कचरा टाकणार्‍या नागरिकांवर दंडात्मक कारवाई करणार असल्याचे यावेळी स्पष्ट केले.
नगरसेविकावैशाली चोरमले म्हणाल्या, ओला व सुका कचरा वेगळा करण्यासाठी शहरातील प्रत्येक घरी 2 डस्टबिन उपलब्ध करुन देणे गरजेचे आहे. त्यामुळे घरातील महिलांना ओला व सुका कचरा वेगवेगळा वर्गीकरण करण्यास सोपे जाईल.
प्रारंभी मुख्याधिकारी प्रसाद काटकर यांनी सर्व उपस्थितांचे स्वागत व मान्यवरांचा सत्कार केल्यानंतर प्रास्ताविकात शहर स्वच्छतेबाबत सविस्तर विवेचन केले.