सहकारमहर्षी स्व.जयवंतराव भोसले यांची आज 95 वी जयंती

कराड: कृष्णाकाठच्या सहकार, आरोग्य आणि शैक्षणिक विकासाचे प्रणेते सहकारमहर्षी स्व. जयवंतराव भोसले (आप्पासाहेब) यांची 95 वी जयंती रविवारी (ता. 22) साजरी होत आहे. यानिमित्त कराड व वाळवा तालुक्यात विविध कार्यक्रमांचे आयोजन करण्यात आले आहे. रविवारी सकाळी 8.30 वाजता जयंती सोहळ्याचा मुख्य कार्यक्रम होणार असून, कृष्णा हॉस्पिटलच्या प्रांगणातील स्व. आप्पासाहेबांच्या पूर्णाकृती पुतळ्यास पुष्पार्पण व अभिवादन करण्यात येणार आहे.
जयंतीनिमित्त कराड येथे रविवारी (ता. 22) सकाळी 6 वाजता कृष्णा वैद्यकीय विज्ञान अभिमत विद्यापीठ आणि कृष्णा हॉस्पिटल व संशोधन केंद्राच्यावतीने भव्य कृष्णा मॅरेथॉन स्पर्धेचे आयोजन करण्यात आले आहे. रेठरे बुद्रुक (ता. कराड) येथे दुपारी 2 वाजता हेमंत धर्मे मित्र परिवाराच्यावतीने भव्य कुस्त्यांचे मैदान आयोजित करण्यात आले आहे. तसेच दि. 23 ते 25 डिसेंबर या काळात रेठरे बुद्रुक (ता. कराड) येथील कृष्णा कारखाना कार्यस्थळावर भव्य कबड्डी स्पर्धा आयोजित करण्यात आल्या आहेत. याचबरोबर येडेमच्छिंद्र (ता. वाळवा) येथे संयोजक डॉ. विश्‍वास पाटील, क्रांतिसिंह नाना पाटील क्रीडा मंडळ व येडेमच्छिंद्र ग्रामस्थांच्यावतीने सहकारमहर्षी स्व. जयवंतराव भोसले चषक राज्यस्तरीय कबड्डी स्पर्धा आयोजित करण्यात आल्या आहेत.
दरम्यान, आप्पासाहेबांच्या 95 व्या जयंतीचे औचित्य साधून रविवारी (ता.22) सकाळी 11 वाजता मलकापूर (ता.कराड) येथील सहकारमहर्षी मा. जयवंतराव भोसले (आप्पा) नागरी सहकारी पतसंस्थेच्या मुख्य प्रशासकीय कार्यालयाचे स्थलांतर मलकापूर भाजी मंडई लगतच्या नव्या वास्तूत होत आहे. या सर्व कार्यक्रमांना आप्पाप्रेमींनी आणि नागरिकांनी मोठ्या संख्येने उपस्थित राहावे, असे आवाहन करण्यात आले आहे.