दरोड्याच्या गुन्ह्यातील आरोपीचे पलायन

सातारा: दोरड्याच्या गुन्ह्यात कराड तालुका पोलिसांनी अटक केलेला आरोपी विकास वसंत गुंडनिकम हा शनिवारी पोलिसांच्या ताब्यातून पळाला. विकास याला सातारा येथील जिल्हा कारागृहातून न्यायालयीन कामकाजासाठी कराड येथे पोलीस मुख्यालयातील पोलीस पार्टीने नेले होते. यावेळी एकूण 14 आरोपी असल्याची माहिती आहे.
याबाबत अधिक माहिती अशी, विकास वसंत गुंडनिकम (रा.भाटमवाडी, ता. वाळवा, जि. सांगली) याला 2016 रोजी कराड तालुका पोलिसांनी दरोड्याच्या गुन्ह्यात अटक केली होती. तेव्हापासून तो सातारा जिल्हा कारागृहातच आहे. दि.21 रोजी त्याला सातारा पोलीस मुख्यालयातील पोलीस पार्टीने कराड येथील न्यायालयात नियमीत सुनावणीसाठी नेले होते. न्यायालयातील कामकाज झाल्यानंतर पोलीस गाडी सातार्‍याकडे निघाली असता, दुसर्‍या एका संशयिताने लघुशंका आल्याचे पोलिसांना सांगितल्याने, पोलीस पार्टीच्या प्रमुखांनी कराड शहर पोलीस ठाण्याच्या आवारात गाडी घेण्यास चालकाला सांगितले.
त्यानंतर लघुशंका आलेल्या आरोपीला बेडीतून काढताना त्याच बेडीत असलेल्या गुंडनिकम याने बेडी काढल्याचा फायदा घेत पळ काढला. पोलिसांनी त्याचा पाठलाग केला मात्र, तो सापडला नाही. या घटनेची कराड शहर पोलीस ठाण्यात रात्री उशीरापर्यंत नोंद करण्याचे काम सुरू होते.