मुंबई, दि. ९ : सातारा येथील शासकीय वैद्यकीय महाविद्यालय व रुग्णालय, सातारा या संस्थेचे “छत्रपती संभाजी महाराज शासकीय वैद्यकीय महाविद्यालय व रुग्णालय, सातारा” असे नामाधिकरण करण्यात आले असल्याची माहिती वैद्यकीय शिक्षण व औषधी द्रव्य मंत्री हसन मुश्रीफ यांनी दिली .
याबाबत अधिक माहिती अशी, सातारा येथे १०० विद्यार्थी क्षमतेचे शासकीय वैद्यकीय महाविद्यालय व संलग्नित ५०० रुग्णखाटांचे रुग्णालय सुरु करण्यास मान्यता देण्यात आली आहे. संस्थेच्या नामाधिकरणाचा शासन निर्णय आज जारी करण्यात आला असून त्यानुषगांने आवश्यक ती कार्यवाही आयुक्त, वैद्यकीय शिक्षण व संशोधन संचालनालय मुंबई करीत असल्याचे, मंत्री श्री मुश्रीफ यांनी सांगितले .
सातारच्या शासकिय वैद्यकीय महाविद्यालयाला स्वराज्याचे दुसरे छत्रपती, श्रीमंत छत्रपती संभाजीमहाराज शासकिय वैद्यकीय महाविद्यालय व रुग्णालय,सातारा असे नांव देण्याचा निर्णय आज राज्यशासनाने घेतला आहे. याचे आम्ही स्वागत करतो. ऐतिहासिक सातारा नगरीतील वैद्यकिय महाविद्यालयासारख्या मोठया महत्वाच्या वास्तुस समर्पक नाव दिले गेल्याने छत्रपती संभाजी महाराज यांच्या कार्यकर्तुत्वाला योग्य तो सन्मान दिला गेला आहे असे अधिकारवाणीचे उद्गार खासदार श्रीमंत छत्रपती उदयनराजे भोसले यांनी व्यक्त केले आहे.
