सातारा :- दिनांक 1 (प्रतिनिधी) गेंडामाळ नाका परिसरातील हुतात्मा उद्यानासाठी नव्याने सिंथेटिक ट्रॅक बनवण्यासह झाडांना सिंचन सुविधा, स्वतंत्र पाण्याची टाकी , ओपन जिमची सुविधा अशा विविध सोयी करण्यात येणार आहे .याबाबतचा तातडीने आराखडा बनवून तो सादर केला जावा असे निर्देश नगराध्यक्ष अमोल मोहिते यांनी बांधकाम विभागाला दिले .अमोल मोहिते यांनी हुतात्मा उद्यानाची प्रत्यक्ष पाहणी करून याबाबत येथील ज्येष्ठ नागरिकांशी चर्चा केली .येथे द्यावयाच्या सुविधांची यादीच यावेळी नागरिकांनी त्यांना सादर केली .
या पाहणी दौऱ्याच्या दरम्यान नगरसेवक विश्वतेज बालगुडे, नगरसेवक अक्षय जाधव, बांधकाम विभागाचे नियंत्रण अधिकारी दिलीप चिद्रे,अभियंता राकेश दहिफळे,वृक्ष विभागाचे अभियंता अनिरुद्ध गाढवे तसेच या बागेसाठी काम करणारे ठेकेदार व परिसरातील जेष्ठ नागरिक यावेळी उपस्थित होते .
शाहूपुरी, अर्कशाळानगर , rअंजली कॉलनी तसेच लगतच्या परिसरातील नागरिकांसाठी सुप्रभात फेरीकरिता हुतात्मा उद्यान हा एक चांगला पर्याय आहे मात्र गेल्या काही वर्षापासून या उद्यानाला असूविधांचे ग्रहण लागले होते .वॉकिंग ट्रॅक ची झालेली दुरावस्था बागेत बेसुमार वाढलेले गवत वृक्षतोड तसेच योगासन हॉलची झालेली दुरावस्था संरक्षक भिंतीची झालेली पडझड पाण्याच्या टाकीचे अपुरे बांधकाम अशा विविध समस्या होत्या .येथील ज्येष्ठ नागरिकांनी या समस्यांच्या कल्पना येथील नगरसेवक विश्वतेज बालगुडे यांना दिल्यानंतर बालगुडे यांनी नगराध्यक्ष अमोल मोहिते यांना हुतात्मा उद्यानाला भेट देण्यासाठी विनंती केली .त्या नुसार नगराध्यक्ष अमोल मोहिते परिसरातील सहकारी नगरसेवक अक्षय जाधव यांच्यासह या बागेच्या पाहणीसाठी हजर झाले .येथील ज्येष्ठ नागरिकांकडून येणाऱ्या अडचणी नगराध्यक्षांनी ऐकून घेतल्या .
.नगराध्यक्षांच्या सूचनेनंतर बागेमध्ये तात्काळ सफाई कामाला सुरुवात झाली आहे .बागेत तीस पथदिवे असून त्यातील वीस पथदिवे तात्काळ सुरू करण्यात आले .वॉकिंग ट्रॅक आणि संरक्षक भिंतीच्या दुरुस्ती संदर्भात महत्त्वाचे निर्णय घेण्यात आले .भिंतीची उंची वाढवून त्याला चेनलिंक करणे तसेच रिकाम्या जागेत पत्र्याच्या शेडमध्ये ओपन जिम साहित्य लावणे तसेच बागेचा वॉकिंग ट्रॅक सिंथेटिक करणे याबाबत तातडीने प्रस्ताव करून ते सर्वसाधारण सभेला सादर करण्याच्या सूचना नगराध्यक्ष अमोल मोहिते यांनी या पाहणी दरम्यान दिल्या .या बागेमध्ये पाण्याच्या टाकीचे काम अद्याप सुरू आहे .ते काम येत्या मार्चपर्यंत पूर्ण करणे तसेच बागेतील शौचालय सुविधा दुरुस्त करण्यासंदर्भातही नगराध्यक्षांनी सूचना दिल्या .बागेतील टाकाऊ साहित्य व अडगळीचे सामान काढून वॉकिंग ट्रॅक स्वच्छ करण्यात येऊन येथील सांडपाणी बंद गटारांच्या माध्यमातून बाहेर काढण्यात येणार आहे .याशिवाय गेंडामाळा नाक्यावरून थेट हुतात्मा उद्यानाच्या प्रवेशद्वारापर्यंत डांबरी रस्ता करण्यासंदर्भातही स्वतंत्र प्रस्ताव केला जाणार असल्याची माहिती बांधकाम विभागाचे अभियंता दिलीप चिद्रे यांनी दिली आहे .हुतात्मा उद्यानाला तातडीने सुविधा दिल्याबद्दल येथील जेष्ठ नागरिकांनी नगराध्यक्ष अमोल मोहिते नगरसेवक विश्वतेज बालगुडे व नगरसेवक अक्षय जाधव यांना धन्यवाद दिले आहेत .
