सातारा दि २ (प्रतिनिधी )दिवंगत उपमुख्यमंत्री अजित पवार यांचे सुरक्षारक्षक विदीप जाधव यांचा बारामती येथे झालेल्या विमान अपघातात दुर्दैवी मृत्यू झाला होता. या दुःखद घटनेनंतर उपमुख्यमंत्री सुनेत्रा अजित पवार यांनी स्वतःचे वैयक्तिक दुःख बाजूला ठेवत विदीप जाधव यांच्या साताऱ्यातील तरडगाव (ता. फलटण) येथील निवासस्थानी भेट देऊन त्यांच्या कुटुंबीयांचे सांत्वन केले.
राज्याचे उपमुख्यमंत्री अजित पवार यांचे २८ जानेवारी रोजी अपघाती निधन झाले. बारामती येथे विमान लँडिंग होत असताना अपघात झाला. या अपघातात अजित पवारांसह पाच जणांचा मृत्यू झाला. यामध्ये अजित पवारांचे सुरक्षारक्षक विदीप जाधव यांचाही मृत्यू झाला.
या दुःखद घटनेनंतर उपमुख्यमंत्री सुनेत्रा अजित पवार यांनी स्वतःचे वैयक्तिक दुःख बाजूला ठेवत विदीप जाधव यांच्या साताऱ्यातील तरडगाव (ता. फलटण) येथील निवासस्थानी भेट देऊन त्यांच्या कुटुंबीयांचे सांत्वन केले.
स्वर्गीय विदीप जाधव यांच्या पत्नी व मुलांच्या डोक्यावर मायेने हात फिरवत, ‘कोणत्याही अडचणीत मी तुमच्या सोबत आहे’ असा धीर देत त्यांनी कुटुंबीयांना आधार दिला. या भावस्पर्शी भेटीमुळे परिसरात उपस्थित अनेकांचे डोळे पाणावले.
कर्तव्यपथावर असतानाही अत्यंत संयम व मायेने जाधव कुटुंबीयांचे दुःख हलके करण्याचा प्रयत्न करत उपमुख्यमंत्री सुनेत्रा पवार यांनी संवेदनशीलतेचा आदर्श घालून दिला.
विदीप यांच्या कुटुंबात आई-वडील, पत्नी आणि एक मुलगा- एक मुलगी असे सदस्य आहेत.विदीप दिलीप जाधव हे उपमुख्यमंत्री अजित पवार यांचे अत्यंत निष्ठावान आणि सतर्कसुरक्षा रक्षक होते. ते वर्ष २००९ पासून मुंबई पोलीस दलात कार्यरत होते आणि अनेक वर्षे अजित पवार यांच्यासोबत सावलीप्रमाणे राहून त्यांची सुरक्षा करत होते. दुर्दैवाने बारामती येथे झालेल्या विमान अपघातात विदीप जाधव यांचे निधन झाले.
ते साताऱ्यातील तरडगाव (ता फलटण) येथील रहिवासी होते.या भीषण दुर्घटनेत अजित पवारांच्या बरोबर विदीप जाधव यांचाही मृत्यू झाल्यानंतर सुनेत्रा पवारांनी त्यांच्या घरी भेट दिली. त्यांनी कै. विदीप जाधव यांच्या परिवाराची सांत्वनपर भेट घेतली व त्यांच्या दुःखात सहभागी होत धीर दिला.
‘माझे पती शेवटपर्यंत दादांबरोबर होते. त्यांनी दादांना कधीच अंतर दिलं नाही. त्याचप्रमाणे वहिनीही माझ्याबरोबर आयुष्यभर राहणार आहेत. माझ्या मुलांकडे आणि संपूर्ण कुटुंबियांकडे त्यांचं लक्ष कायम राहील. त्यांचं आणि आमचं नातं घरच्यासारखं आहे, असं विदीप जाधव यांच्या पत्नी संध्या जाधव म्हणाल्या. सुनेत्रा पवारांचं दुःख आणि माझं दुःख एकसारखं आहे, तरीही त्या उभ्या आहेत, त्यांनी माझ्यावर आणि घरावर हात ठेवला आहे, हे मी विसरू शकत नाही, असंही त्या कृतज्ञतापूर्वक म्हणाल्या.
‘माझ्यासाठी हा मोठा धक्का आहे. परमेश्वराच्या कृपेने सावरण्याचा प्रयत्न करतोय. मुलाच्या अपेक्षा खूप होत्या. तशा पूर्ण झाल्या नाहीत. कारण तो अर्धवट सोडून गेला. तो एकुलता एक मुलगा आहे. २६ जानेवारीला प्रत्यक्ष त्यांच्याशी बोलण झालं होतं, अशी प्रतिक्रिया विदीप जाधव यांच्या वडिलांनी दिली.
यावेळी फलटण कोरेगाव चे आमदार सचिन पाटील माजी आमदार दीपक चव्हाण राष्ट्रवादीचे जिल्हाध्यक्ष बाळासाहेब सोळसकर शिवरूपराजे खर्डेकर आणि ग्रामस्थ मोठ्या संख्येने उपस्थित होते
