‌क्रेडाई सातारा तर्फे क्रेडाई महाराष्ट्राच्या दक्षिण-पश्चिम विभागाची सर्वसाधारण सभा संपन्न

सातारा : क्रेडाई महाराष्ट्राच्या दक्षिण-पश्चिम विभागाची 2025–26 या वर्षातील तिसरी सर्वसाधारण सभा क्रेडाई, सातारा यांच्या वतीने सातारा येथे यशस्वीरीत्या आयोजित करण्यात आली. दक्षिण-पश्चिम महाराष्ट्रातील 20 हून अधिक शहरांमधील नामांकित बांधकाम व्यावसायिक व क्षेत्रातील मान्यवरांनी उत्स्फूर्त सहभाग नोंदविला.
कार्यक्रमाची सुरुवात दीपप्रज्वलन करण्यात आली. यावेळी क्रेडाई महाराष्ट्राचे अध्यक्ष श्री. प्रफुल्ल तावरे, उपाध्यक्ष श्री. विद्यानंद बेडेकर, कोषाध्यक्ष श्री. सुरेंद्र भोईटे, संयुक्त कोषाध्यक्ष श्री. दशरथ शेट्ये तसेच क्रेडाई साताऱ्याचे अध्यक्ष श्री. शकील सय्यद आणि सचिव श्री. राहुल वाखारिया उपस्थित होते.
स्वागतपर भाषणात श्री. शकील सय्यद यांनी समन्वयित विकास, धोरणात्मक जागरूकता आणि शाश्वत वाढ यांचे महत्त्व अधोरेखित केले. त्यानंतर श्री. दशरथ शेट्ये यांनी दक्षिण-पश्चिम विभागाच्या दुसऱ्या सर्वसाधारण सभेचे इतिवृत्त सादर केले.मार्गदर्शनपर भाषणात श्री. विद्यानंद बेडेकर आणि श्री. प्रफुल्ल तावरे यांनी पायाभूत सुविधा समन्वय, नियामक सुधारणा आणि रिअल इस्टेट क्षेत्राचा भविष्यातील दृष्टीकोन यावर सविस्त Aर मार्गदर्शन केले.
सत्रातील विशेष आकर्षण म्हणजे नगररचना संचालक श्री. जितेंद्र भोपाली यांचे “नवीन महाबळेश्वर विकास आराखड्याअंतर्गत बांधकाम व पर्यटन क्षेत्रातील विकासाच्या संधी” या विषयावरील विशेष व्याख्यान होय. या सत्रातून प्रदेशाच्या भावी विकासासाठी महत्त्वपूर्ण धोरणात्मक दिशा मिळाली.
महाराष्ट्र राज्यातील UDCPR (युनिफाइड डेव्हलपमेंट कंट्रोल अँड प्रमोशन रेग्युलेशन्स) संदर्भातील फायदे व तोटे या विषयावर संयुक्त नगररचना संचालक श्री. विजयकुमार वाघमोडे यांच्या सहभागासह आ. ययाती टापळे व आ. सुधीर शिंदे (सातारा) यांच्या उपस्थितीत पॅनेल चर्चेचे आयोजन करण्यात आले. या चर्चेत नियोजन सुधारणा व अंमलबजावणीतील आव्हाने यावर सखोल विचारमंथन झाले. क्रेडाई महाराष्ट्र विधी समितीचे संयोजक अ‍ॅड. माजिद कच्छी यांनी बिगरशेती (NA) जमीन रूपांतरण, बांधकाम नकाशा मंजुरी व एकरकमी NA कर भरणा यासंबंधी अलीकडील शासन निर्णयातील सुधारणा स्पष्ट केल्या.
कार्यक्रमाचा समारोप खुल्या चर्चासत्राने झाला. या सत्रात श्री. विद्यानंद बेडेकर, श्री. सुरेंद्र भोईटे, श्री. दशरथ शेट्ये, श्री. शकील सय्यद, श्री. रवी खिलारे आणि श्री. राहुल वाखारिया यांनी सहभाग घेतला. त्यानंतर सचिव श्री. राहुल वाखारिया यांनी आभार प्रदर्शन करत उपस्थित मान्यवर, वक्ते, प्रायोजक व सर्व सदस्यांचे आभार मानले.