पाटण:- पत्रकारांना जीवे मारण्याची धमकी देणार्या मुजोर खासदार संजय दिना पाटील याचा पाटण तालुका पत्रकार संघाच्यावतीने गुरूवारी तीव्र शब्दात जाहीर निषेध करण्यात आला. मुख्यमंत्री देवेंद्र फडणवीस यांनी पत्रकारांना दिलेल्या धमकीची दखल घेऊन संजय दिना पाटील याचा राजीनामा घेवून त्याच्यावर कडक कायदेशीर कारवाई करावी, अशी मागणी पाटण तालुका पत्रकार संघाच्यावतीने मुख्यमंत्री देवेंद्र फडणवीस यांच्याकडे करण्यात आली आहे. या मागणीचे निवेदन प्रांताधिकारी सोपान टोम्पे व तहसीलदार अनंत गुरव यांना देण्यात आले.
निवेदनात म्हटले आहे, खा. संजय दिना पाटील याने मुंबई येथे पत्रकारांच्याबाबतीत शिवराळ भाषा वापरुन जीवे मारण्याची धमकी दिली. संविधानात्मक पद असलेल्या अशा व्यक्तीस लोकशाहीचा चौथा स्तंभ संभाळणार्या पत्रकारांच्या बाबतीत अशी शिवराळ भाषा अशोभनीय आहे. अशा मस्तवाल खासदाराचा अखिल भारतीय मराठी पत्रकार परिषद संलग्न पाटण तालुका पत्रकार संघ जाहीर निषेध करत असून लोकशाहीला काळीमा असणार्या खासदाराचा तात्काळ राजीनामा घेऊन त्याच्यावर पत्रकार संरक्षण कायद्याअंतर्गत गुन्हा दाखल करावा, अशी मागणी पाटण तालुका पत्रकार संघाच्यावतीने करण्यात निवेदनात करण्यात आली आहे.
याप्रसंगी प्रांताधिकारी सोपान टोम्पे व तहसीलदार अनंत गुरव यांना निवेदन देण्यात आले.
यावेळी पत्रकारांनी तीव्र शब्दात खा. संजय दिना पाटील यांच्या वक्तव्याचा जाहीर शब्दात निषेध व्यक्त केला. निवेदन देतेवेळी पाटण तालुका पत्रकार संघाचे अध्यक्ष विक्रांत कांबळे, पत्रकार हल्ला विरोधी कृती समिती सदस्य शंकरराव मोहिते, महिला राज्य सरचिटणीस विद्या म्हासुर्णेकर, सचिव नितीन खैरमोडे, सहसचिव राजेंद्र सावंत, उपाध्यक्ष संदेश बनसोडे, पत्रकार निलेश साळुंखे, सुरेश संकपाळ, संजय कांबळे, बाबासाहेब सुतार, योगेश हिरवे, खाशाबा चव्हाण आदींसह पत्रकार उपस्थित होते.
मुंबई येथे खा. संजय दिना पाटील याने पत्रकारांच्याबाबतीत अर्वाच्य भाषा वापरून जीवे मारण्याची धमकी दिली आहे ही निषेधार्ह्य बाब आहे. संविधानात्मक पद असलेला हा खासदार लोकशाहीला काळीमा ठरलेला आहे. अशा खासदाराला पदावर राहण्याचा कोणताही अधिकार नाही. अशा मुजोर खासदाराचा पंतप्रधान व मुख्यमंत्र्यांनी तात्काळ राजीनामा घ्यावा त्याला बडतर्फ करावे.
:- शंकरराव मोहिते, पत्रकार हल्ला विरोधी कृती समिती सदस्य महाराष्ट्र राज्य
पत्रकार हा नेते व शासकीय अधिकारी यांच्यातील दुवा असतो. शासनाच्या विविध योजना, नेते मंडळींनी केलेली कामे सर्वसामान्य लोकांपर्यंत पोहोचवण्याचे काम पत्रकार करतो. मात्र काही मस्तवाल नेते, खासदार पत्रकारांच्याबाबतीत अर्वाच्य शब्द वापरून धमकीची भाषा वापरत असतील तर पत्रकारही त्यांना त्याच पध्दतीने धडा शिकवल्याशिवाय राहणार नाहीत. खा. संजय पाटील याने केलेल्या वक्तव्याचा पाटण तालुका पत्रकार संघ जाहीर निषेध व्यक्त करत आहे. यापुढे असे वक्तव्य खपवून घेणार नाही, पत्रकार रस्त्यावर उतरल्याशिवाय राहणार नाही.
:- विक्रांत कांबळे, अध्यक्ष, पाटण तालुका पत्रकार संघ
