सातारा : शिवथर ता. सातारा येथे एका धाब्यावर दत्तात्रय प्रकाश जाधव (मूळ रा. मालगाव ता. सातारा, सध्या रा. वाठार स्टे. ता. कोरेगाव) याच्याकडून स्थानिक गुन्हे अन्वेषण विभागाने गावठी पिस्टल जप्त केले. दरम्यान, संशयित हा माजी ग्रामपंचायत सदस्य असून, सध्या तो वडापाव विक्रीचा व्यवसाय करत आहे.
या घटनेतील संशयीत दत्तात्रय जाधव याला सापळा रचून एलसीबीच्या पथकाने अटक केल्यानंतर त्याच्याकडे विना परवाना बेकायदेशीर स्वत:च्या कब्जात वापरलेले एक गावठी पिस्टल, एक जीवंत काडतुस, मोटार सायकल, किंमती मोबाईल असा सुमारे 95 हजार रुपयांचा मुद्देमाल पोलिसांनी हस्तगत केला. तसेच जाधव याच्याविरोधात कोरेगाव पोलिस ठाण्यात गुन्हा दाखल करण्यात आला.माजी ग्रामपंचायत सदस्याकडे पिस्टल आढळल्यामुळे खळबळ उडाली.
दत्तात्रय जाधव यांच्याकडे पिस्टल असल्याची माहिती एलसीबीला मिळाली होती. आज गुरुवारी पोलिसांनी सापळा रचुन जाधव यांची झडती घेतली असता त्याच्याकडे पिस्टल सापडले. पोनि पद्माकर घनवट यांच्या मार्गदर्शनाखाली फौजदार सागर गवसने, पोलीस हवालदार विलास नागे, संजय पवार, पोलीस हवालदार ज्योतीराम बर्गे, मधुकर गुरव, पोलीस नाईक मोहन नाचण, योगेश पोळ, संतोष जाधव, नितीन भोसले, राजकुमार ननावरे, प्रवीण कडव, गणेश कचरे, मारुती अडागळे यांनी या कारवाईत सहभाग घेतला होता. या कारवाईबद्दल पोलीस अधिक्षक संदीप पाटील व अप्पर पोलीस अधिक्षक विजय पवार यांनी अभिनंदन केले आहे.
