अजिंक्यतारा कारखान्याकडून एफआरपीप्रमाणे ऊसाचे संपुर्ण पेमेंट अदा

साताराः गाळपास आलेल्या ऊसाचा रू.515/- प्रति मे.टनाचा हप्ता अजिंक्यतारा सहकारी साखर कारखान्याकडून सोमवार दि.22.4.2019 रोजी बँकेत वर्ग करण्यात येत असून, एफ.आर.पी. प्रमाणे रू.2,815/- प्र.मे.टन या दराने गाळपास आलेल्या ऊसाचे संपूर्ण पेमेंट अजिंक्यतारा सहकारी साखर कारखान्याने संबंधीत ऊसपुरवठादार शेतकर्‍यांना केले असल्याची माहिती कारखान्याचे मार्गदर्शक संचालक आ. श्रीमंत छ.शिवेंद्रसिंहराजे भोंसले यांनी दिली.
कारखान्याच्या सन 2018-19 मध्ये 6,36,339 मे.टन ऊसाचे गाळप होऊन 7,85,400 क्विंटल साखर उत्पादन झाले आहे. या गळीत हंगामात सरासरी साखर उतारा 12.33 % इतका राहिला आहे. कारखान्याचा हा गळीत हंगाम नेहमीप्रमाणे यंदाही यशस्वीपणे पार पडला असून कारखान्याचे कार्यकारी संचालक, सर्व खातेप्रमुख व कर्मचारी यांनी उत्कृष्ट कार्यक्षमतेने काम केले आहे.
कारखान्याचे योग्य आर्थिक नियोजन व योग्य व्यवस्थापन यामुळे व संचालक मंडळाने केलेले सहकार्य, ऊस उत्पादक सभासद, बिगर सभासद, तोडणी व वाहतूक कंत्राटदार यांच्या सहकार्याने गळीत हंगाम यशस्वी संपन्न झाला असल्याचे आ. शिवेंद्रसिंहराजे यांनी यावेळी सांगितले.
याप्रसंगी कारखान्याचे अध्यक्ष सर्जेराव दिनकरराव सावंत, उपाध्यक्ष विश्‍वास रामचंद्र शेडगे, संचालक मंडळाचे सर्व संचालक सदस्य, कार्यकारी संचालक संजीव देसाई उपस्थित होते.