..अन्यथा जिल्ह्यात विभाजन झाले असते, लोणंद येथील माथाडी कामगार मेळाव्यात उदयनराजे भोसले यांची स्पष्टोक्ती

लोणंद : स्थानिक भूमिपुत्रांच्या रोजगाराचा प्रश्न मी उपस्थित केला तर माझ्यावरच खंडणीचा ठपका ठेवला गेला. जनतेची उन्नती हाच माझा स्वार्थ आहे. आजपर्यंत जनतेची साथ मिळाली. यापुढेही अशीच साथ दिली तर निश्चितपणे सर्व प्रश्न मार्गी लावू. जिल्ह्यावर संकट येते तेव्हा मीच पुढे असतो. त्यामुळे जिल्हा टिकून आहे. नाहीतर कधीच दोन जिल्ह्यात विभाजन झाले असते, असे प्रतिपादन सातारा लोकसभा मतदार संघातील राष्ट्रवादी काँग्रेस, काँग्रेस व मित्र पक्षांचे उमेदवार श्री. छ. उदयनराजे भोसले यांनी केले.
लोणंद येथील अमृता मंगल कार्यालयात झालेल्या खंडाळा तालुक्यातील माथाडी कामगार मेळाव्यात ते बोलत होते.
यावेळी जिल्हा काँग्रेसचे उपाध्यक्ष अ‍ॅड. बाळासाहेब बागवान, ज्येष्ठ नेते बकाजीराव पाटील, जिल्हा परिषदेचे माजी उपाध्यक्ष नितिन भरगुडे- पाटील, माजी समाजकल्याण सभापती आनंदराव शेळके- पाटील, खंडाळा पंचायत समितीचे माजी सभापती एस. वाय. पवार, अजय धायगुडे- पाटील, बबनराव शेळके- पाटील, सुनील काटकर आदी प्रमुख उपस्थीत होते.
उदयनराजे म्हणाले, खंडाळ्यात औद्योगिक एसईझेड क्षेत्रात अनेक परदेशी कंपन्या आल्या. मात्र त्या उभारण्यासाठी ज्यांनी जमिनी दिल्या त्या भूमिपुत्रांना व तालुक्यातील स्थानीक बेरोजगार युवकांना या कंपण्यात नोकर्‍या व उद्योग व्यावसायात डावलले गेले. असे का झाले, माहित नाही. मात्र या सर्व कंपनी प्रतिनिधींची बैठक घेवून स्थानिक तरुणांना न्याय देण्याची भूमिका घेतली जाईल.
खंडाळा हा दुष्काळी तालुका. येथील शेती पाटपाण्याचा प्रश्न अद्यापही सुटलेला नाही. खरं तर हक्काच्या पाण्यावरील अधिकार सोडण्याचे काय कारण ?लोकप्रतिनिधी व येथील लोकांनी सजग राहून जर तुम्ही तुमच्या हक्काचे पाणी मिळवू शकला नाही तर तालुक्यात राहण्याचा तुम्हाला काहीएक अधिकार उरत नाही. तोंडावर बोट ठेवून फक्त बघत राहायचे, पुढच्या पिढीला काय उत्तर देणार आहात ? असा सवाल उदयनराजे भोसले यांनी केला.
ये करेंगे, वो करेंगे म्हणणार्‍यांनी नोटाबंदी करुन प्रत्येकाच्या आयुष्यातील पुंजी काढून घेतली अनं आपल्या आजूबाजूच्यांना गब्बर केले. त्यांच्याकडे देशाच्या वार्षिक बजेटपेक्षा कितीतरी अधिक मालमत्ता आहे. फक्त ही मालमत्ता वापरली तर देशातील सर्वांना मोफत शिक्षण, औषधे मिळली असती. गरीबांना घरे आणि शेतकर्‍यांवरही आत्महत्या करण्याची वेळ आली नसती. सर्वच क्षेत्रात दयनिय अवस्था करुन ठेवली आहे. पुन्हा तेच जर सत्तेवर आले तर रशीयाचे जसे तुकडे झाले तसेच देशाचे देशातील प्रत्येक कुटुंबाचे तुकडे व्हायाला वेळ लागणार नाही.यासाठी देशात सत्तांतर आवश्यक आहे, असे आवाहन उदयनराजे यांनी केले.
नितिन भरगुडे-पाटील म्हणाले, माझ्यासह ज्येष्ठ नेते बकाजीराव पाटील, आनंदराव शेळके-पाटील, एस. वाय.पवार ; आम्ही कोठेही गेलो नाही. आणि जाणारही नाही. राष्ट्रवादी काँग्रेसमध्येच आहोत. उदयनराजेंच्या प्रेमापोटी प्रचारात उतरलो आहोत. आमचे तुमच्यावर निश्चितपणे प्रेम आहे. आमच्यावर असाच वरदहस्त ठेवावा. खंडाळा तालुका निश्चितपणे विकासाच्या बाबत पुढे जाईल.
जिल्ह्यातील काही नेत्यांनी खंडाळा तालुक्यात माथाडी कामगार संघटना उभ्या करुन मारामार्‍या, गोळीबार घडवून आणला. लोणंद येथील सुमारे 125 कामगारांना महिनाभर तुरंगात खितपत पडावे लागले. अशा कठीण प्रसंगी उदयनराजे भोसले यांनी कामगारांच्या केसालाही धक्का लागून देणार नाही, अशी भूमिका घेत आवश्यक सहकार्य केले. या घटनेची जाणिव ठेवून यावेळीही त्यांनाच मतदान करणे हे तालुक्यातील प्रत्येक माथाडी कामगारांचे कर्तव्य असल्याचे अ‍ॅड.बाळासाहेब बागवान यांनी यावेळी सांगीतले.
प्रास्तावीक अ‍ॅड. बागवान यांनी केले. सुत्रसंचालन सर्फराज बागवान यांनी केले. नगरसेवक राजेंद्र डोईफोडे, रणजित माने, अनिल व्हटकर, हेमलता कर्ऩवर, स्वाती भंडलकर, दादबा केसकर, अप्पासाहेब शेळके, ऋषिकेश धायगुडे-पाटील, प्रकाश केसकर, नारायण लोखंडे, महंमदशेठ कच्छी, शरद भडलकर, अशोक डोईफोडे, अण्णा जाधव, रत्नाकर झारेकरी, सर्फराज बागवान आदी उपस्थीत होते.