जैवविविधता समितीचा राजकीय धरसोडपणा सुरूच

सातारा: सातारा शहर व परिसराचा अभ्यास करणार्‍या जैवविविधता समितीचे गठनं करताना अनुसुचित जाती प्रवर्गाच्या महिलेची नेमणूक ही अट डावलण्याचा प्रयत्न झाल्याने समितीच्या वैधतेवर प्रश्नचिन्ह उभे राहिले होते म्हणजेच पर्यावरणाच्या संवेदनशीलते विषयीची वैचारिक बैठकच या सदस्यांकडे नसल्याचे स्पष्ट झाले आहे . सातारा विकास आघाडीचे तीन, नगरविकास आघाडी व भाजपच्या प्रत्येकी दोन सदस्यांसह सचिव म्हणून उपमुख्याधिकारी म्हणून संचित कृष्णा धुमाळ यांची नियुक्ती करण्यात आली आहे .
सातार्‍याची जैवविविधता त्यांचा शोध , संशोधन व विकास हा बहुपेडी विषय संवेदनशीलतेने हाताळणारे अभ्यासू नगरसेवक सातारा नगरपालिकेत हे शहराच्या नैसर्गिक भवतालाचे दुर्दैव आहे. तब्बल सात दिवसाच्या पाठपुराव्यानंतर सातारा विकास आघाडी यांचे तीन सदस्य, नगर विकास आघाडी व भाजप यांचे प्रत्येकी दोन सदस्यांची नावे सुचवण्यात आली. मात्र ही नावे देताना पदाधिकार्‍यांनी त्यांची सवड आणि राजकीय सोय बघताना प्रशासनाची प्रचंड कुतरओढ केली. जैव समितीची नावे निश्चित करून घेताना वृक्ष विभागाला पदाधिकार्‍यांच्या अक्षरशः नाकदुर्‍या काढाव्या लागल्या. अखेर विशेष सभा झाल्यानंतर आठ दिवसाच्या विलंबाने साविआकडून नगराध्यक्ष माधवी कदम, उपनगराध्यक्ष किशोर शिंदे , सभागृह नेत्या स्मिता घोडके, नगर विकास आघाडीकडून अशोक मोने, अमोल मोहिते, भाजपकडून मिलिंद काकडे व सिध्दी पवारयांचे नाव निश्चित करण्यात आले. या कार्यकारी समितीचे सचिव उपमुख्याधिकारी संचित धुमाळ यांचे नाव निश्चित झाले आहे. मात्र समितीची नावे देताना पदाधिकार्‍यांनी सरधोपटपणे आपआपल्या नावाचा आग्रह धरला. मात्र दोन महिला व अनुसुचित जातीचा एक सदस्य आवश्यक या अटींना तिलांजली देण्यात आली होती. मात्र उपमुख्याधिकारी संचित धुमाळ यांनी ऐनवेळी दुरुस्ती करत जांभळे यांच्या ऐवजी अनुसुचित प्रवर्गाच्या मिलिंद काकडे यांच्या नावाचा अंर्तभाव केला.
गेल्या 7 नोव्हेंबर रोजी पालिकेची जी विशेष सभा झाली त्या सभेच्या इतिवृत्तांमध्ये या नावांचा समावेश करून जैवविविधता समिती गठीत करण्यात आल्याची माहिती नगर परिषद संचालनालयाला कळवली जाणार आहे. मात्र या समितीच्या गठनं प्रक्रियेत नगरसेवकांनी जी अनभिज्ञता दाखवली ते सारेच अनाकलनीय होते. मात्र प्रशासनाने समंजसपणा दाखवत जैवविविधता समितीची प्रक्रिया पूर्ण केली आहे .जैवविविधता समिती पुढीलप्रमाणे: नगराध्यक्ष माधवी कदम, उपनगराध्यक्ष किशोर शिंदे, स्मिता घोडके, अशोक मोने, अमोल मोहिते, सिद्धी पवार, मिलिंद काकडे.