नवी दिल्ली : भारत-वेस्ट इंडीज यांच्यात खेळल्या जात असलेल्या चार कसोटी सामन्यांच्या मालिकेनंतर अमेरिकेतील फ्लोरिडा येथे उभय देशांत टी-20 मालिकेचे आयोजन करण्याविषयी चर्चा होणार आहे.
बीसीसीआय आणि विंडीज क्रिकेट बोर्डाच्या अधिकार्‍यांमध्ये पुढील महिन्यात फ्लोरिडात टी-20 मालिका आयोजन करण्यासंदर्भात आगामी बुधवार, गुरुवारी चर्चा होण्याची शक्यता आहे. कसोटी मालिका आटोपताच टी-20 मालिका होऊ शकते का, याची चाचपणी बैठकीत केली जाईल. कसोटी मालिकेचा समारोप 22 ऑगस्ट रोजी त्रिनिदाद येथे होईल.
24 ऑगस्ट ते 27 ऑगस्ट आणि 28 ऑगस्ट हे दिवस टी-20 सामन्यांचे आयोजन करण्यासाठी उपलब्ध असतील. याआधी 2012 मध्ये वेस्ट इंडीजने न्यूझिलंडविरुद्ध अमेरिकेत दोन टी-20 सामने खेळले होते, पण आयसीसीने जून 2015 मध्ये अमेरिकेच्या क्रिकेट बोर्डावर निलंबन बजावले. ऑगस्टमधील मालिकेला मंजुरी मिळाल्यास 2012 नंतर अमेरिकेत ही पहिलीच मालिका असेल
