सातारा दि. २२ : सांगली सह सातारा स्थानिक प्राधिकारी मतदारसंघ विधान परिषद निवडणूक २०२६ मध्ये धैर्यशिल ज्ञानदेव कदम हे उमेदवार विजयी झाल्याचे जिल्हाधिकारी तथा निवडणूक निर्णय अधिकारी डॉ. मैनाक घोष यांनी जाहीर केले. निवडणुकीची मतमोजणी तरुण भारत व्यायाम मंडळ इमारत, सांगली येथे पार पडली.
मतमोजणीचा निकाल – उमेदवाराचे नाव व मिळालेली मते अनुक्रमे पुढीलप्रमाणे –
– धैर्यशिल ज्ञानदेव कदम ५९३ मते
– अभयसिंह खाशेराव जगताप २९२ मते
– किशोर हणमंत धुमाळ 0 मते
एकूण ८९५ पैकी ८९४ मतदारांनी मतदान केले होते. त्यापैकी ८८५ मते वैध ठरली तर ९ मते अवैध ठरली. विजयासाठीचा कोटा ४४३ मतांचा होता.
तरुण भारत व्यायाम मंडळ इमारत, सांगली येथे सकाळी ८ वाजता मतमोजणी प्रक्रिया सुरू झाली. तत्पूर्वी निवडणूक निरीक्षक डॉ. अमित सैनी व निवडणूक निर्णय अधिकारी डॉ. मैनाक घोष यांच्या उपस्थितीत स्ट्राँग रूमचे सील तोडून ती खोलण्यात आली. सहायक निवडणूक निर्णय अधिकारी डॉ. स्नेहल कनिचे यांनी उपस्थितांना गोपनीयतेची शपथ दिली. त्यानंतर मतपत्रिकांचा ताळमेळ व मतपत्रिकांची सरमिसळ करण्यात येऊन मतमोजणी प्रक्रिया सुरू करण्यात आली. यावेळी अपर जिल्हाधिकारी सुशांत खांडेकर, सहायक निवडणूक निर्णय अधिकारी नागेश पाटील, उपजिल्हाधिकारी शिवाजी जगताप यांच्यासह मतमोजणीसाठी नियुक्त अधिकारी, कर्मचारी उपस्थित होते.
मतमोजणीसाठी एकूण पाच टेबलांची व्यवस्था करण्यात आली होती. प्रत्येक टेबलसाठी एक मतमोजणी पर्यवेक्षक, एक मतमोजणी सहायक आणि एक शिपाई यांची नियुक्ती करण्यात आली होती. तसेच दोन मतमोजणी पर्यवेक्षक, दोन मतमोजणी सहायक आणि दोन शिपाई कर्मचारी राखीव ठेवण्यात आले होते. याशिवाय रांग अधिकारी, हौद अधिकारी आणि टॅब्युलेशन पथकाचीही नियुक्ती करण्यात आली होती. मतमोजणीसाठी चोख पोलीस बंदोबस्त ठेवण्यात आला होता.
मतमोजणी प्रक्रिया पारदर्शक, अचूक आणि सुरळीत पार पडावी यासाठी नियुक्त सर्व अधिकारी, कर्मचारी व पोलीस यांनी मेहनत घेतली.
०००००
