स्टेलेनबॉस्च : दक्षिण आफ्रिकेचा धावपटू, मब्लेड रनरफ म्हणून प्रसिद्ध असलेला ऑस्कर पिस्टोरियस याला प्रेयसी रिव्हा स्टीनकॅम्प हिच्या हत्येप्रकरणी सहा वर्षांच्या तुरूंगवासाची शिक्षा ठोठावण्यात आली आहे. त्याची रवानगी तत्काळ तुरुंगात करण्यात आली आहे.
2013 मध्ये व्हॅलेंटाईन्स डेच्या दिवशी ऑस्करने त्याच्या घरी केलेल्या गोळीबारात प्रेयसी रिव्हाचा मृत्यू झाला होता, त्याप्रकरणी ऑस्करने आपण घरात चोर घुसल्याचे समजून गोळीबार केला, त्यात अनावधानाने रिव्हाचा मृत्यू झाला असे सांगून बचाव केला होता. मागील वर्षी दक्षिण आफ्रिकेच्या न्यायालयाने ऑस्करला दोषी ठरवत 5 वर्षांच्या तुरूंगावासाची शिक्षा ठोठावली. कनिष्ठ न्यायालयाने ऑस्करला सदोष मनुष्यवधाच्या गुन्ह्याखाली दोषी ठरवले. काही काळानंतर त्याची जामिनावर सुटका झाली.
त्यानंतर दक्षिण आफ्रिकेच्या सर्वोच्च न्यायालयाने त्याला सदोष मनुष्यवधाऐवजी हत्येच्या गुन्हयाखाली दोषी ठरवले होते, या शिक्षेला आव्हानही देण्यात आले. मात्र अखेर बुधवारी झालेल्या सुनावणी दरम्यान दक्षिण आफ्रिकेच्या सर्वोच्च न्यायालयाने ऑस्करला दोषी ठरवत सहा वर्षांची शिक्षा ठोठावण्यात आली.
पॅराऑल्मपिकमध्ये सहा सुवर्णपदके मिळवणारा ऑस्कर 2012 लंडन मुख्य ऑलम्पिक स्पर्धेत सहभागी झाला होता. शारीरीकदृष्टया अपंग असूनही मुख्य ऑलिम्पिक स्पर्धेत सहभागी होणारा तो पहिला धावपटू ठरला होता.
