पुनर्वसीत कोंढवली, पानस गावठाणांसाठी 86 लाख 61 हजार ; आ. शिवेंद्रसिंहराजेंच्या प्रयत्नातून निधी ; रस्ता, संरक्षक भिंतीसह ग्रा. प. कार्यालय मार्गी 

साताराः सातारा- जावली मतदारसंघातील प्रत्येक गाव, वाडी वस्तीवर विकासकामांची गंगा प्रवाहीत करुन आ. श्रीमंत छ. शिवेंद्रसिंहराजे भोसले यांनी मतदारसंघाचा चेहरामोहरा बदलून टाकला आहे. मतदारसंघातील कोंढवली (लिंब ता. सातारा) आणि पासन (ता. जावली) या दोन पुनर्वसीत गावठाणांमध्ये नागरी सुविधा पुरवण्यासाठी आ. शिवेंद्रसिंहराजे भोसले यांच्या प्रयत्नातून तब्बल 86 लाख 61 हजार रुपयांचा निधी मंजूर झाला आहे.
मतदारसंघाचा चौफेर विकास साधण्यासाठी आमदार फंडासह राज्य आणि केंद्र शासनाच्या विविध योजनांना मंजूरी घेवून विविध विकासकामांसाठी आ. शिवेंद्रसिंहराजे यांनी सातत्याने भरीव निधी उपलब्ध करुन दिला आहे. मतदारसंघातील सातारा तालुक्यातील कोंढवली या पुनर्वसीत गावात शाळेभोवती संरक्षक भिंत बांधणे आणि ग्रामपंचायत कार्यालय बांधणे, जावली तालुक्यातील पानस या पुनर्वसीत गावासाठी पानस ते कुडाळ पोहोच रस्ता डांबरीकरण करणे व मोरी बांधकाम करणे ही कामे मंजूर करण्यासाठी आ. शिवेंद्रसिंहराजे यांनी पाठपुरावा केला. आ. शिवेंद्रसिंहराजे यांच्या सुचनेनुसार प्रशासनाने सदर कामांचे प्रस्ताव शासनस्तरावर पाठवले. सदर कामांना धोम प्रकल्पांतर्गत पुनर्वसीत गावांना नागरी सुविधा पुरवणे या योजनेंतर्गत आ. शिवेंद्रसिंहराजे यांनी मंजूरी मिळवून भरीव निधी उपलब्ध करुन दिला आहे.
सातारा तालुक्यातील कोंढवली येथील शाळेभोवती संरक्षक भिंत बांधण्यासाठी 26 लाख 2 हजार 447 रुपये तर ग्रामपंचायत कार्यालय बांधण्यासाठी 16 लाख 73 हजार 534 रुपये निधी मंजूर करण्यात आला आहे.  जावली तालुक्यातील पानस या पुनर्वसीत गावासाठी पानस ते कुडाळ पोहोच रस्ता डांबरीकरण करणे व मोरी बांधकाम करणे या कामासाठी 43 लाख 85 हजार 23 रुपये असा भरिव निधी उपलब्ध झाला आहे. निधीच्या उपलब्धतेमुळे कोंढवली येथील शाळेच्या संरक्षक भिंतीचे आणि ग्रामपंचायत कार्यालयाचा प्रश्‍न मार्गी लागणार असून पासन ते कुडाळ पोहोच रस्त्यामुळे दळणवळणाचा प्रश्‍न कायमचा सुटणार आहे. या तीनही कामांची निविदा प्रक्रीया तातडीने पुर्ण करुन त्वरीत कामाला सुरुवात करावी. कामे दर्जेदार करावीत, अशा सुचना आ. शिवेंद्रसिंहराजे भोसले यांनी संबंधीत अधिकार्‍यांना केल्या आहेत.