वाई : धोम हत्याकांडातील आरोपी संतोष पोळ याने न्यायालयाला लाय डिटेक्टर व नार्को चाचणी करायला परवानगी दिली. माझे निर्दोषत्व सिध्द करण्यासाठी ज्या ज्या चाचण्या करणे गरजेचे आहे त्या सर्व चाचण्या करण्यास माझी हरकत नाही असे त्याने न्यायमुर्ती आर. के. थोरात यांना सांगितले. पोलीसांनी पोळची नार्को व लायडिटेक्टर चाचणी करण्यास परवानगी न्यायालयाकडे मागितली होती.
संतोष पोळने सहा खून केल्याचे पोलीस तपासात सांगितल ेआहे. मात्र त्याने तपास कामात पोलिसांना सहकार्य केले नाही. त्याने आजून खून व आणखी काही गंभीर स्वरुपाची कृत्ये केल्याचा पोलीसांना संशय आहे त्याच्या असहकार्यामुळेच पोलीसांनी न्या. आर. के. थोरात यांच्याकडे पोळच्या नार्को व लाय डीटेक्टर चाचणी करण्याची परवानगी मागितली. याबाबत आज निर्णय देण्या अगोदर न्यायालयाने पोळ व त्याचे वकील औरगाबादकर यांच्याकडे विचारणा केली. त्यानंतर वकीलांशी चर्चा करुन त्याने चाचण्यास तयार असल्याचे सांगितले.
दरम्यान, आज सहाव्या व निता नरहरी गायकवाड यांच्या खून प्रकरणात फक्त एक दिवसाचीच पोलीस कोठडी बुधवारी न्यायालयाने दिली होती. आज ती पोलीस कोठडी वाढवून देण्यास नकार देत न्यायालयाने पोळची न्यायालयीन कोठडीत रवानगी केली. यावेळी तपासी अधिकारी सहायक पोलीस निरीक्षक बाळासाहेब भरणे यांनी न्यायालयाला गायकवाड यांच्या खूनातील हत्यारे, सोने व साथीदाराचा शोध घ्यायचा आहे त्यासाठी मिळालेली पोलीस कोठडी अपुरी आहे ती वाढवून मिळावण्याबाबत न्यायालयाकडे मागणी केली. सरकारी वकील सोनावणे यांनीही तशीच मागणी केली. मात्र पोळचे वकील मकरंद औरंगाबादकर (पुणे) यांनी न्यायालयाला सांगितले की आज पोलीसांनी कोठडी मागताना बुधवारची कारणे रिमांड यादीत दिली आहेत. हा गुन्हा गंभीर स्वरुपाचा आहे हे मी समजू शकतो. परंतु ऑगस्ट महिन्यापासून पोळ पोलीस कोठडीत आहे. तेव्हापासून आजपर्यत पोलीसांनी तपास केला आहे त्यामुळे आणखी पोलीस कोठडी वाढवून देण्यात येवू नये असे सांगितले. न्यायालयाने त्याची चौदा दिवसांच्या न्यायालयीन कोठडीत रवानगी केली. यानंतर पोलीसांनी पुढील गुन्हयात तपास कामासाठी पोळला ताब्यात घेण्यास न्यायालयाची परवानगी मागितली. त्याप्रमाणे डॉ. घोटवडेकर यांच्या रुग्ण्वाहिका चोरी प्रकरणी पोळला पोलीसताब्यात घेणार आहेत.आज न्यायालयात सुनावणी वेळी पोळची पत्नी आपल्या दोन वर्षाच्या मुलाला घेवून न्यायालयात आली होती.
