औंध:मंगळवारी रात्री वडूज ते औंध रस्त्त्यावरील पळशीगावानजीकच्या फाटयावर वडूज कडून कराडकडे तसेच वरूड ते औंध मार्गे कराडकडे अवैध्यरित्या वाळू वाहतूक करणार्या सहा डंपरवर धडक कारवाई करुन महसूल विभागाने डंपर , वाळूसह सुमारे तीस लाख रुपयांचा ऐवज जप्त केला.
महसूल विभागाच्या याधडक कारवाई मुळे अवैध्यरित्या वाळू वाहतूक करणार्या वाळू व्यावसायिकांचे धाबे दणाणले आहेत. यापुढे ही धडक कारवाई सुरूच राहणार असल्याची माहिती औंधचे मंडलाधिकारी प्रताप राऊत यांनी दिली.
याबाबबतची अधिक माहिती अशी, मागील काही दिवसांपासून औंध परिसरातून कराड,सातारा, कडेगाव सांगली भागात मोठ्या प्रमाणात अवैध्यरित्या वाळू वाहतूक सुरू होती. यामध्ये मागील एक महिन्यापूर्वी औंध येथील एका नागरिकाचा बेदरकारपणे डंपर चालविल्याने डंपरचालकाने त्याला उडविल्यामुळे म्रूत्यु झाला होता. त्याचे तीव्र पडसाद उमटले होते.
त्यामुळे औंध भागातून सुरू असलेली अवैध्य वाळू वाहतूक रोखण्याचे आव्हान महसूल विभागासमोर उभे राहिले होते.मंगळवारी रात्री आठ ते नऊच्या सुमारास प्रांताधिकारी दादासाहेब कांबळे यांच्या मार्गदर्शनाखाली तहसीलदार सुशील बेल्लेकर, नायब तहसीलदार सुधाकर धाईंजे, मंडलाधिकारी प्रताप राऊत,विजय पाटील, किशोर घनवट, शरद सानप,अभय शिंदे, अजित लोखंडे, धनंजय तडवळेकर यांच्या पथकाने पळशी फाटा व औंध वरुड रस्त्यावर सापळा लावून वाळूने भरलेले एकूण सहा डंपर तसेच एक मोकळा ट्रक असा डंपर व वाळूसह सुमारे तीस लाखाचा ऐवज जप्त केला.अचानक झालेल्या कारवाई मुळे वाळू सम्राटांचे धाबे दणाणले .सध्या सि.कुरोली, औंध,चौकीचा आंबा तसेच गोपूज ,पुसेसावळी मार्गे ही अवैध्य वाळू वाहतूक राजरोसपणे सुरू होती. महसूल विभागाने केलेल्या धडक कारवाई मुळे सर्वसामान्य जनतेतून समाधान व्यक्त केले जात असून या अवैध्य वाहतूकीचे समूळ उच्चाटन करावे अशी मागणी केली जात आहे. दरम्यान यामधील जप्त केलेले चार वाळू डंपर वडूज तहसील कार्यालय तर दोन डंपर औंध पोलीस स्टेशनमध्ये लावण्यात आले आहेत. बुधवारी उशीरापर्यत जप्त केलेल्या डंपरचे पंचनामे नझाल्याने पुढे नेमकी काय कारवाई झाली हे समजू शकले नाही.
