फलटण नगरपरिषद विषय समित्यांच्या सभापती निवडी बिनविरोध

फलटण : फलटण नगरपरिषद विषय समित्यांचे सर्व सभापती निवडी बिनविरोध जाहीर करण्यात आल्या असुन आरोग्य समितीच्या सभापतीपदी अजय माळवे यांची तर बांधकाम समितीच्या सभापती पदी मधुबाला भोसले यांची निवड झाली आहे. शहरात सध्या महात्वाकांक्षी भुयारी गटार योजना व स्वच्छ सर्वेक्षण यांचे काम सुरु असल्याने या निवडींना विशेष महत्व प्राप्त झाले आहे.
फलटण नगरपरिषदेच्या विशेष सभेत सदर विषय समितीच्या निवडी पिठासन अधिकारी तथा तहसिलदार विजय पाटील यांच्या अध्यक्षतेखाली व मुख्यधिकारी प्रसाद काटकर व नगराध्यक्षा निता नेवसे यांच्या प्रमुख उपस्थितीत या निवडी जाहिर करण्यात आल्या. यावेळी सार्वजनिक बांधकाम समिती सभापती पदी ड. मधुबाला दिलीपसिंह भोसले, पाणी पुरवठा व जलनिःसारण समिती सभापती पदी ज्योत्स्ना शिरतोडे,स्वच्छता, वैधक आणि सार्वजनिक आरोग्य समिती सभापती पदी अजय दत्तात्रय माळवे, शिक्षण क्रिडा व सांस्कृतिक कार्य समिती सभापती पदी असिफ अब्दुल मेटकरी, महिला व बालकल्याण समिती सभापती पदी सुवर्णा अमरसिंह खानविलकर, उपसभापती पदी प्रगती जगन्नाथ कापसे, स्थायी समितीत रघुनाथराजे नाईक निंबाळकर, सुभद्राराजे नाईक निंबाळकर व अशोक जाधव यांच्या सदस्य पदी निवडी बिनविरोध जाहिर करण्यात आल्या आहेत.
विषय समितीच्या सभापतीपदासाठी असणारे नामनिर्देश पत्र स्विकारल्या नंतर पिठासन अधिकारी विजय पाटील यांनी नामनिर्देश पत्रांची छाननी करुन निवडी जाहीर केल्या. निवडी नंतर नगराध्यक्षा निता नेवसे, तहसिलदार विजय पाटील, मुख्याधिकारी प्रसाद काटकर यांनी नवनियुक्त सभापती व सदस्यांचा सत्कार केला. यावेळी सर्व नगरसेवक उपस्थित होते.
सदर निवड प्रक्रियेनंतर नूतन सभापतींचे तहसिलदार विजय पाटील यांनी अभिनंदन केले. यानंतर नूतन पदाधिकारी व स्थायी समिती सदस्यांचे सुभद्राराजे नाईक निंबाळकर व नगराध्यक्षा निता नेवसे यांच्या हस्ते सत्कार करण्यात आला. निवडणूक प्रक्रिया सुरळीतपणे पार पडल्यानंतर आभार मुख्याधिकारी प्रसाद काटकर यांनी मानले.
दरम्यान फलटण शहर स्मार्ट सिटी करणे, शहराच्या दृष्टीने महत्वपुर्ण असणारी भुयारी गटार योजना, स्वच्छ सर्वेक्षण 2019 या योजनांतर्गत शहरात कामे सुरु आहेत. सदर कामे दर्जेदार होण्याच्या दृष्टीने अभ्यासू सभापती असणे आवश्यक असल्याच्या प्रतिक्रिया नागरिकांमधून व्यक्त होत होत्या. त्या पार्श्वभूमीवर राष्ट्रवादी काँग्रेसच्या नेतृत्वाने निवडींचा बँलन्स साधल्याने समाधान व्यक्त होत आहे.